НИШКЕПАЗ, ИНЕШКИПАЗ, э. – лувондови, кода и Мирть-Масторть тииец, Чипазкс, Шкайкс. Н. ульсь Чипазть кельгома цёрац, сяс сон максозе теенза пцтай сембе эсь виенц. Кой-кона мифнень эса Н. – Анге Патяйть оцю цёрац (ванк: Анге Патяй). Сонь лувондозь толть, кельгомать, семьять, менельть, мешнень и нешкнень ваныкс, лездыкс. Мокшэрзятне лувондозь Н. и Шкайкс, кона касфты мешт, конань перьфке лиендихть мешт – ваймот. Нижегородскяй губерниянь терюхаттне и эрзятне теенза мярьгольхть Инечипаз (Инечи – очижи) – Шкаень цёра. Молитватнень эса Н. – сисемце Шкайсь, кона ащи кототнень лангса. Сон тии тяштть, конат, кода арьсесть, павазу ломанень ваймот.

Миронь-Масторонь тиемань мифнень эса Н. няфневи оцю ломанькс, кувака туста шяярь, модати токай акша сакал мархта. Мзярс сон уды шуфтть ала, Масторсь касы, шашфтомок менельть и модать; лоткне пяшкодихть ведьта, лисихть лисьмапрят; такор модать лангса шачи тише, жуватат, нармотть и ст. тов. Мифологическяй моротнень эса Н. явсы ломанень павазть, ащемок тума тарад лангса.

Н. маштоль арамс гулюкс, мацикс, пзьгатакс, врьгазкс, букакс, алашакс, нумолкс, офтокс. Н. кельгома нармонец локстись, кона кучф менельста и лезды тиемс цебярь шкайхнень и ломаттнень ёткса. Кастарга – Н. фкя менелень стирец. Мифнень эса Н. эряма вастокс азови Каргонь Кись или Весы созвездиясь. Н. ули золотань нюрямоц, конань сон валхтсы менельста золотань цинзерса и сиянь проволкаса, штоба сявомс модаста стирьхнень, конат ашесть му эстеест цёрат.

Повериять коряс, Н. якась кулхцондома куд вальмятнень алга (кие мезень колга корхтай, мезе анай). Штоба ётафтомс сярядемать, эряволь вальмава максомс кодамовок кулоф ломанень или сярядиень щам анцинянди и азомс: "На, сявк, кантк монь цёразти тона шити".

Симбирскяй, Пензенскяй губерниянь мокшэрзятне арьсесть, што Н. улихть лама кудонза, коса эряйхть пара ломанень ваймот. Кода мешне лиендихть мешавать ваксса, стане и пара ломанень ваймотне лиендельхть Н. ваксса. Н. макссь эсь тядянцты Анге Патяйти кев, конань мархта сон тиендсь цебярь духт.

Н. тиендсть башка озондома илат – велень (кепотьксонди, Пятруда меле, Бабань каша), юронь, случайнай (сярядемста, коське кизоть, кодамовок аф цебярьда). Иланди печкольхть учат, сараст; эняльдельхть лездомс тя или тона тевса, анальхть цебярь сёронь шачема, пизем, ванфтомс цярахманда, вармада и ст. тов. Озондомат Н. тиендсть и кстиндамста, коса тяфта жа эняльдсть одс шачити шумбраши, паваз, ванфтома аф цебярь сельмода, ведунда. Н. эняльдсть и лама мормацямаса – эждемаса, пращенгаса, пидефта, прафта, куень пупафта и ст. тов.

Нижегородскяй и Самарскяй губерниянь терюхаттнень, эрзятнень мифологияснон коряс, кона мала христианскяй верондамати Христозть куломанц колга, Н. кучезе ломаттненди Чипазсь и, кода арьсесть, эрясь сон Масторть лангса ломанень шамаса, лездомок ломаттненди (тонафтсь цебяренди, пчкафтсь, ётафтолезе кяжть и ст. тов). Ломаттнень взафтозень Шяйтанць и синь шавозь Н., кона кеподсь менельти. Тянкса Н. наказазень ломаттнень: шить лямбоц и сембе Мастор лангса лямбось кирьфтась сисемксть, тялось тяфта жа якшафтсь сисемксть. Модась кармась максома сяда кржа шачема, жувататне – кальдявста раштама.

Лит.: Mainof W. Les restes de la mythologie Mordvine // Journal de la Societe Finno-Ougrienne. Helsingissä, 1889; Мельников П.И. (Андрей Печерский). Очерки мордвы. Саранск, 1981; Маскаев А.И. Мордовская народная эпическая песня. Саранск, 1964.