ЧИСЛАТ, м., э. (мокшень и эрзянь вал апак мук) – ломаттнень верондамаса, илатнень эса улихть магическяй значениясна. Ч. лувомать васенда сотнелезь ломанень понда, миронь предметтнень мархта (кафта кятть, колма калхт, фкя сур). Лувольхть сурса или тиендсть тяштькст кодамовок шуфта лангса. Пинге ётазь Ч. арасть знаконь классокс, конат лездсть няфтемс мифологическяй миронь модельть; кой-конат синь ётксост кандсть сакральнай смузь.
Сире пингонь эрямаса пцтай сембе Ч. кемонти молемс кандсть башка символика. Лама илатне, аф мярьгоматне ульсть сотфт фкя Ч. мархта: кизозонза шабать афолезь нара шяярензон, афолезь няфне ваномати (ламос афоль ушеда корхтама). Повериять коряс, кда сявомс шабать васенце сёронь видема шиня паксяв – курок кармай ушедома якама. Койть коряс, васенце лисьф пейть крксезь сиянь монетаса, а васенце прафть – ёрялезь седялу (штоба пейхне улельхть цебярьхть). Верондасть, кда сивомс вететнень эзда фкя лисьф "кядь" тишень юрста – аф шачфтат киза. Инициальнай магиять коряс (васенце шинь магия) приметакшнезь, кепотьксонди, Од кизонь шить коряс сембе сай кизоть; васенце атямть коряс – кизонь погодать, шачемать.
Пяк оцю мяль шарфнесть васенце куду сувайти илань шиня, сяда пяк Очижиста (приметакшнезь: кодама ломань сувай, тяфтама и кизось ули); васенце васьфтьф ломанть коряс стирьхне ёрасть содамс цёраснон (женихснон) лемснон; кода ётай рьвяяма-максома илась, кодама ули кись, рамамась. Тиендсть эсь лацонь илат тунда жуватань стадав васенце лихтемста (путнесть ортатнень туркс каркс, хлопиезь жувататнень вермань тараткаса; макссесть стадань ваны ломанти алхт и ст. т.). Штоба кельголезь од рьвянять мирденц кудса, васенцеда сон салаване шталезе шаманц пянакудть ваксса.
Сяда шуроста васьфневи кафта Ч. (сидеста содама ёфкснень эса, колендемаса).
Оцю васта мифологическяй арьсемаса занци колма Ч. Озксонь ётафтомста вирьса вешендсть васта, коса фкя-фкянь маласа ащельхть колма шуфтт: пяшесь, келусь и тумось. Мифологическяй азондоматнень эса Масторть кирдьсазь колма калхне (акша калсь, севрюгась, осётрась); Масторть колма ушетксонза, крхка лотконза; стирти, кона ащи склепса, тядяц сай колмоксть; куломась сашенды колмоксть цёрать инкса, но сяряди цёрась анай кядьстонза эряма нинге колма кизот; пекияф сире бабась, авась каннесы эсь шабанц колма кизот, шачфтомась ётай колма недяляста; мокшень мороса Масторонь стирть Васальгять Атямшкайсь (Пургинепазсь, э.) сявсы менельти нюрямса колмоце люкштядемда меле; мифическяй куйсь веши эсь прянь аралама (кие араласы) колма кизот; тюремась моли колма акатнень-дугаттнень ёткова. Шачфтомда меле шталезь шачфты авать и шабать колма уштома баняса, колма ведьса. Повериять коряс, кда аф уштомс колма банят – шабась кулы. Верондасть, што кда парямс сярядить колмоксть тяльмоса, конань кочкалезь колма келуста, сявомс кефт колма баняста, валомс ведьса, конань кандомс колма лисьмапряста – сярядись пчкяй. Штоба пчкафтомс маштыксть, ведь сявольхть колма лисьмапряста и шталезь мархтонза шабать; эсь пингозонза апак каннек шабать колмоксть "пиделезь" (путолезь лямбе пянакудти, сяда сидеста – кшинь таргамда меле, штоба шабась кенерель). Ломаттнень верованияснон коряс, илять пайкне церькавса гайкфтевихть колмоксть шуроста сяс, мес тя пингть озондыхть аф эсь куломасост кулоф ломаттне (ваяйхне, эсь прянь повайхне, винас палфне); цёрать и стирть (рьвяяйхнень) ётафтолезь шрать перьфке колмоксть; торонь кандысь ёталь пееленц (торонц) мархта оттнень алашаснон перьф рьвяяма-максома иласта тяфта жа колмоксть, штоба синь ванфтомс сельмода, аф цебярьда. Колдуттнень эзда, сельмода сельгондельхть колмоксть кержи лафтубрява; сялгольхть колма салмокст или булавкат од рьвянять щамозонза; сотольхть колма сюрет (якстерь, акша, равжа), колма ожнат шабатнень кядьс или повфнезь кргазост. Колма Ч. няфневи Мирть вертикальнай структурац (колма царстват): менельсь, модась и тона шись.
Сире пингонь мокшэрзятнень эрямаса, илатнень эса, коса ванфтовсть сире арьсематне, илатне, оцю васта занци кота Ч: рьвакс моли стирть панароц сёрматф кота китьксса; коень мороса ётафневи стирть кота панаронзон вачкамасна (марамасна) парьти. Тя Ч. ванфтовсь парень наряжамаса (резьбаса), коса кирделезь аватнень щамснон-карямснон, наряжамаснон.
Кода арьсесть кой-кона исследовательхне, финно-угорскяй общностьса ульсь (или аньцек ушеткшнесь) котонь Ч. лувома, кона тяда меле поладовсь кемоннекс.
Ламоц сире пингонь мокшэрзятнень наряжамасна (сурксне, килькшне) тифт колма, кота, кемгафтува пяльксста (предметста). Шабань колендамаса ("чакат") ульсть тяфта жа кота кевнят.
Мифологияса, илатнень эса оцю васта занци сисем Ч. Моротнень эса цебярь стирть колга кулясь моли сисем вирень, паксянь туркс. Магическяй сисем Ч. тя кепотьксса няфти пяк оцю, ичкоздень васта. Тоста ичкозде (сисем вирь фталда) сайхть стирти кудатне. Илань баняда меле рьвакс моли стирсь, эняльдемок Банявати (банянь ваныти, Оцюняти, ванк: Банява) кизефнесы, коса шачсть керф шочкне банянди, кие синь керозень и сонць азсы, што синь кассть Сура и Рава (Волга) ляйхнень тона трваса пиче вирьса, керфт сисем узерьса, ускфт сисем алашаса. Рьвяяма-масксома илань моротнень эса арьсесть од рьвяняти шачфтомс сисем стирхть и сисем цёрат; афольхть мярьге рьвяямс, венцямс эсь юрозост сисемце коленати (поколенияти) молемс.
Эрзятнень карьсна ульсть сисем ленгянь; Тюштянь колга моротнень эса (ванк: Тюштя) геройсь сокай сисем алашаса, сонь налонза сисем пудонь. Мифологическяй сюжетть коряс, эрзятнень шачемда меле (конатнень тиезень Нишке – ванк: Нишкепаз) синь раштасть и арасть эздост сисем велет; стирть, конань кочказь крепостень строяма иланди, усксазь сисем алашаса пайгоня мархта, штоба афоль кулев сонь авардемац, кона марявсь сисем вайгяльбет. Мифологическяй моротнень эса Нишке Шкайсь аф мярьги панжемс сисемце утомть Ёндолшкайть Масторста сявф рьванцты Азравкати, сяс мес аньцек тоста сон могла няемс эсь тядянц-алянц кудонц. "Васальгя" мороса тядят-алят, конатнень сисем цёрасна, эняльдельхть, штоба Шкабавазсь (ванк: Шкай) максоль теест стирня; мифическяй драконть Карязть (каряз – копорь, позвоночник) сисем копоренза, прянза.
Тя пингс сисем Ч. путнесазь тевс сюдомаса "Тук сисем сельхть модава"; сидеста аф цебярь ялгати (врагти) арьсельхть шачемс пондазонза копт "сисем пряса, баяронь кудряса" (пяк оцю). Мормацяматнень – шятематнень эса ювадьсазь лездома сисем шяйтаттнень.
Мифологияса, иласа васьфневихть ниле, кемонь, кемгафтува Ч.: Масторть ниле уженза, коса ащихть ниле столбат; Масторавать лемс илань жуватась (ванк: Масторава) керови ниле пяльксова и калмосеви кудть ниле ужева; ниле китькст сёрмадольхть мокшень панархненди.
Кемгафтувоце стирть-локстить толганзон саласы цёрась, кона сяльде арай сондеенза мирдекс; эрзянь рьвяяма-максома илань пярякась "Лувонь кши" тиеволь кемгафтува слойста, мекольцесь (вяре слойсь) наряжаволь ниле саразонь алса или ниле гулюняса, конатнень тиелезь шапаксста. Повериять коряс, павазсь оттненди кармай молема сембе светть ниле ширденза.
Фольклорса васьфневихть колмогемонь, сизьгемонь сисем Ч.: мифическяй геройсь Тюштя (ванк: Тюштя) тяфта жа машты сокамс модать колмогемонь алашаса; эрзянь свадьбань иласа сизьгемонь сисем кудат. Мормацяматнень эса ведуттнень каршес эняльдсть сизьгемонь сисем ангелхненди и сизьгемонь сисем святойхненди; тя числась сидеста путоволь тевс мормацяматнень эса, маштыксонь пчкафтомста, токамста (сизьгемонь сисем пакарь, сизьгемонь сисем сустав, сизьгемонь сисем святой) и ст. тов.
Магическяй значениясна ульсть чётнай и аф чётнай Ч. Рьвяяма-максома иласа рьвянять рамамста ярмакнень Ч. эрявольхть аф чётнайхть (луволезь, што кудса аш ялга кулоф ломанти); помондамаса, меколанкт, сембонь каннелезь чётнайста (штоба няфтемс, што семьяса аш лишнай ломань и куломс аш кинди). Повериять коряс, кда фкя кулофти (покойникти) тиихть кафта лазкст, кудса кармай улема тага кулы.
Башка Ч. путолезь тевс колдубамань магияса (сяда пяк колмоть и вейхксоть). Вейхкса снавса снав куфтолсь, конань ёрдалезь оттнень алашаснон инголи, лоткафтолезень алашаснон (паваз аф ули); пчкафтомаса цилькнень ётафтолезь колмоксть синь токамок вейхкса снавса.
Мокшетнень верондамаса магическяй ролец ульсь кемонь Ч.: нумда меле кадондсть кемонь сёра прянят мифическяй "паксянь казанди".
Лит.: Маскаев А.И. Мордовская народная эпическая песня. Саранск, 1966; УПТМН. Т. 1. Эпические и лиро-эпические песни. Саранск, 1963; Мартьянов В.Н., Надькин Д.Т. К вопросу о финно-угорской системе счисления // Материалы по археологии и этнографии Мордовии. Саранск, 1975.