18. Mi lää Riiga mehele.

SL 761.
H I 6, 103 (8) < Vastseliina khlk. - K.Fluss (1895).

Miä meil abi laulõmast,
miä kullal kuugumast -
olõ-i meil umma kuulõmah,
marja man saisõmah!
Kavvõh ommaq mi umaq,
maa takah meelimar´aq.
Mi lää Riiga mehele,
kalaranda kasuma,
kos iks kurõq kulda sööväq,
kurõq kulda, kanaq karda,
haniq haljast hõbõdat,
(piigakeseq paberit,
varõsõq sööväq vanna vaskõ,
pesälinnuq penningit,
targaq linnuq taalderit);
koh kasviq kesväq keerulitsõq,
kaaraq kolmõkandilitsõq,
koh oll´ piirak perve pääl,
oja all juusk´ piimäkeist.
Sarapuuh sääl kasviq saiaq,
kuusõ otsah kanamunaq.