25. Mille meid suvi soriti?

SL 772.
EKS 8° 4, 471 (35) < Räpina, Kõnnu k. - J.Jagomann < Okse Tanilovits (1877).

Neiokõsõq noorõkõsõq,
mille meid suvi soriti,
talv tarrõ naarõti?
Neiokõnõ noorõkõnõ
haari ma_ks imält küsütellä,
haari kandjalt kaubõlda:
"Imäkene, helläkene,
mamma, meelimar´akõnõ,
ütle_ks mullõ ütsi sõna,
kosta mullõ kolmi sõna:
(neiokõnõ noorõkõnõ)
mille meid iks suvi soriti,
talv tarrõ naarõti?"
"Tütär hellä linnukõnõ,
mino meelimar´akõnõ,
sii ma sinolõ ütle,
sii kullalõ kuuluda!
Võtku-i vihas, pangu-i pahas,
sii ma ütle uma tõttu,
ütle uma latsõ tõttu -
tütär hellä linnukõnõ,
mino meelimar´akõnõ,
selle sinno suvi soriti,
talv tarrõ naarõti:
suvi oll´ suu mõskmada,
talv tarõ pühkmädä,
pää oll´ sul iks sugimada,
hiuss lahhe laap´mada -
mõtsa_ks-sugaraq sugevaq,
laanõ ladvaq lahotivaq!"