4. Armastuse igatsus.

SL 737.
H II 59, 267 (8) < Setumaa - A.Suurkask (1897).

Miä mul abi laulõmasta,
kua kulla kuukumasta?
Olõ-i umma kuulõmanna,
marja manna saisõmanna!
Kavvõh ommaq jo mu umaq,
maa takah meelimar´aq:
jovva-i kiviga jo visata,
ei sõudaq sõmõralla.
Ei ma tiiäq tervüsi,
ei kuulõq kuulusi,
ei andaq armusõnna.
Kingi pall´o tervüsi:
mitu puu puhmakõista,
mitu hal´ast hainakõsta,
neeq anguq armusõnno,
kink´kuq pall´o tervüsi!
Kaks esimest värsijalga lauldakse siin kaks korda järestikku: Miä mul abi, miä mul abi ... jne.

SL 738.
H I 8, 421 (19) < Vastseliina khlk. - J.Sandra < J. Hussar (1896).

Olõs iks umma nätäq saassi,
umma kallist kaiaq saassi,
läässi läbi eätse järve,
tulõssi läbi tulitsõ mõtsa!
Uma om mul kavvõtah,
viiesaa versta takah,
tuhandõ tulba takah.
Ei ma tiiäq terves,
ei ma kuulõq kuulus,
tiiä-i tervüst lähätä,
mõista-i anda armusõnna!
Jõvva-i kiviga visata,
jõvva-i sõudaq sõmõrilla:
kivi peio pudõnõs,
sõmmõr sõrmilõ lagonõs.
Mitu puu-puhmakõist,
mitu hal´ast hainakõist,
nuuq tälle tervüst viiguq,
nuuq andkuq armusõnnu!

SL 739.
H I 8, 422 (22) < Vastseliina khlk. - J.Sandra < J. Hussar (1896).

Jummal tiid jumalakõnõ,
Mari tiid madalakõnõ,
koh mu uma olõnõssa,
käbüküpär käünessä!
Ehk om uma imä üsäh,
käändles imä kässi pääl,
riidlõs imä rinna man?

SL 740.
H II 3, 577 (96) < Vastseliina khlk. - H.Prants (1890).

No mi laulgõq, no mi laskõq,
no mi, vell´oq, veerätägeq!
Sõsarõni, armahõni,
jalki ütle tõista värki,
kabo katsildõ jo kõnõla,
mar´a ütle, tõõsõ anna:
ku mi, kullaq, kokko saami,
sõsarõni, armahõni,
no mi laulgõq, no mi laskõq!
Jalki ütle tõista värki,
kabo katsildõ jo kõnõla:
kavvõh olliq mi umatsõq,
maa takah meelimar´aq.
Ei tiiäq tervüst,
ei kuulõq kuulust.
Mitu puuda tii veereh,
setu hal´ast hainakõst,
tuu tälle tervüst veeguq,
tuu anguq armusõnno.
Kavvõh olliq mi umatsõq,
maa takah meelimar´aq:
ei tiiäq tervüst,
ei kuulõq kuulust!