12. Ärä mi joogu-i meelekeistä!(Laadolõ minneh).

SL 813.
H, Setu 1884, 444 (17) < Teaste k. - Jak.Hurt < Teaste Saava (1884).

Velekeseq noorõkõsõq,
panni_ks mi ette hobõsõ,
panni virga vehmerehe,
miä olõ-i iä ette saanuq,
kuu pääväq kohki käunuq.
Lää_ks mi mäkke mängih,
kallõht pite karatõh.
Kui mi_ks lää minemähe,
velekeseq veerümähe,
kohe mi_ks keerüdä hobõsõ,
kohe verevä veerüdä?
Süü_ks tä haina taivast,
juu vii vikahtkaarist.
Kui mi lää, veleq, veerümä,
tsõõrikaoq, kallumahe,
kui mi_ks lää teedä pite,
marsi, mar´aq, maada pite,
kui_ks mi lää kõrdsi kõrvalõ,
lää viina veere pääle,
juu mi topsi, juu tõõsõ,
katsi-kolmi kummutõllõ,
ärä_ks mi joogu-i meelekeistä,
joogu-i pääsko pääkeistä!
Kui mi_ks juu meelekese,
juu päsko pääkese,
kui mi lää turgu, tuvikõsõq,
lää liina, linnukõsõq,
varas sääl iks hobõsõ varastas,
kuri miis sadula kohendas!
Kae_ks, kae meelestäni,
kae meele poolõstani -
jõie_ks topsi, juu tõõsõ,
pikõrida poolitõisi!
Olgõ_ks mi iloh edimätseq,
laulukiräh keskemätseq!
Hüä_ks oll´ kaiaq kaejal,
paremb nätäq nägijäl,
et naa_ks veleq ilotõlliq,
imelatsõq laulaskõlliq!
Kõõ naa_ks elliq ilosahe,
kõõ naaq kasviq kaunihe,
sündüq naa_ks ütele söögile,
lahkuq ütte laulõmahe.
Naaq ommaq kui_ks üte ime latsõq,
üte kannõduq kanasõq -
ega naaq tükü-i tülü pääle,
ega taha-i tapõlõma!
Selle naa_ks tükü-i tülü pääle,
selle taha-i tapõlõma:
kui naa_ks lätsiq kõrdsi kõrvalõ,
lätsiq viina veere pääle,
jõie_ks topsi, jõieq tõõsõ,
katsi-kolmi kummutõlliq,
egas juu-s meelekestä,
juu-s pääsko pääkestä,
juu-s pungast poodirahha,
takast vanna taaderit,
juu-s naaq iist ese hiiro,
vell´o virka vehmerist!