24. Nekrudilaul.

SL 833.
H III 29, 958 (26) < Setumaa - M.Evert < Juuli Pille (1901).

Velekeseq noorõkõsõq,
noorõkõsõq, nõrgakõsõq!
Edo_ks meidä velekesi,
meidä meelimar´akõsi -
viiäs iks meid, velju, Vinnemaalõ,
kaabukandjaq kavvõmbahe,
kutsutas meid kuningilõ,
ette viiäs esändile!
Velekeseq noorõkõsõq,
noorõkõsõq, nõrgakõsõq!
Edo_ks meidä vaesit,
ala ilma armõtusi -
uma jätä_ks mi kodo jumalaga,
uma maja Marijaga.
Jummal tiid iks jumalakõnõ,
esi tiid Issandakõnõ -
ega_ks mi näe-i enämb neidä maida,
kullaq, neid kotussit.
Velekese_ks mi noorõkõsõq,
noorõkõsõq, nõrgakõsõq,
surma-pangõ_ks-rätti suu viirde,
kalmurätti karmanihe!
Velekese_ks, noorõkõsõq,
süä om no haigõ, miil paha.
Ega_ks mi meelel või-i merde minnä,
süämel süvvä võrõngohe!
Velekese_ks mi noorõkõsõq,
minnä_ks, minnä, [miä tetäq],
olõ-i iks meil kodo jäiä!
Edo_ks meidä mehekesi,
meidä meelimar´akõsi!

SL 834.
EKS 8° 4, 245 (34) < Räpinä khlk. - J.Jagomann [p.o. < Okse Tanilovits] (1877).

Ku mi olli_ks, poisiq, väigokõsõq,
imekanaq kasinaq,
olli mi_ks maa[h] mar´a suuru,
söödü[l] sõmõra suuru,
ega meid tiiäq tessätnik,
taipaq valla vanõmbaq.
Kui saimi mi poisiq kasunus,
virveq üles vinnünüs,
kui saimi mi maakündijäst,
arol adrakandijast,
sis meid no tiise tessätnikiq,
taipsiq valla vanõmbaq.
Sis naati meid köüdsil köütmähe,
oh´ol kinni hoitmahe.
Külä peläs iks ummi künnimaid,
vald ummi varikit.
Ega tennü-s kurja kubijalõ,
vihha tii-i mi mõisa velitsile,
ega künnä-i mi külä künnimaid,
rao-i mi valla varikit,
ega kiso-i mi kivikelderit,
ega kaku-i mi kaarakambret!