18. Neiu hius ja naiste linik.

SL 863.
EKS 8° 4, 436 (15) < Räpina, Kõnnu k. - J.Jagomann < Okse Tanilovits (1877).

Neiokõnõ noorõkõnõ,
noorõkõnõ, helläkene,
kitke_ks umma neio-ello,
kallist kasvupõlvõkõist!
Neio_ks sirgõ siidi alla,
neio priske peene all,
neio_ks vallus vanikul.
Oh mu hellä hiusõkõist,
vahaladva var´okõist!
Neiokõnõ noorõkõnõ,
suud ma_ks mõsi moromunõl,
tuhaperäl tossutõlli -
siski_ks saasiq ilmaillos´,
ilmaillos´, vahavallus´!
Hiuss iks pikki piha pääl,
tõnõ ohu ola pääl
pidi_ks piha, kati kaala,
pidi mo piha ilosahe,
kati kaala kaunihe.
Neiokõnõ noorõkõnõ,
esi ma_ks kõnne tiidä möödä,
jalaq marseq maada möödä,
hiuss mul iks lehe lepistoh,
vahalatva varikoh.
Meesi_ks mõtõl´ - mõtsa varjo,
poisiq mõtliq - puie varjo,
vana meesi - variko varjo.
Esi ma_ks teesi, neiokõnõ:
vahaladva var´okõnõ,
hellä hiusõ hiilgaminõ!
Liniket iks õdagoni,
pääpaika paganat -
neiokõnõ noorõkõnõ
mõsi_ks seebil säitsmel,
uhe viil ütesäl,
siski_ks veereq vereväq,
silmäkotusõq sinitseq!
Ärä_ks murri Musto sarvõ,
lahki leie Laagi sarvõ,
neiokõnõ noorõkõnõ,
orsi tuvvõh Otepäält,
parsi Pühäpalosta
linikidõ kuivada,
par´kunuidõ pääle pandaq!