8. Lastõ kar´alaul.

SL 939.
H, Setu 1903, 113 (58) < Helbi k. - Jak. Hurt < Miku Ode (1903).

Näe_ks mi katsaq kar´usõq,
näe_ks mi ütsäq öüdsiliseq -
tulgõ_ks ti siiä selle poolõ,
mi_ks touka tollõ poolõ,
saa_ks mi, kullaq, üttekokko,
mar´aq tõinõtõsõ mano!
Ti_ks tohi-i siiä tulla,
tulla_ks siiäq selle poolõ:
omma_ks teil tõpraq tõrvadsõq,
omma_ks teil vasigaq vaigudsõq!
Mi_ks kar´ah mii hõng,
vas´kil vaha hõng -
ega_ks ti tohi-i siiä tullaq,
siiä tulla selle poolõ,
tougadaq tollõ poolõ!
Nu_ks mi painu pallõma:
ajagõ_ks siiä selle poolõ,
mi_ks touka tollõ poolõ,
karja_ks meil kokko kaalus,
vasika_ks meil kokko vass´us,
lamba_ks kokko laskus.
Neio_ks-kõsõq noorõkõsõq,
saa_ks mi kokko, kullakõsõq,
mar´a_ks mi tõnõtõsõ mano,
kaalu mi_ks kirjo kaema:
omma_ks kinäq kirätüüq,
peenikene pilutüü.
Umblõ mi_ks udsurõivit,
kaala-mi-kirjo kirotõllõ,
umblõ mi ala kumagurõiva,
pääle umblõ_ks tuu udsuhammõlõ,
liida_ks linarõivallõ.
Neio_ks-kõsõq noorõkõsõq,
noorõ_ks-kõsõq, nõrgakõsõq!
Kinä_ks meil elo kesä pääl,
nopõ_ks elo nurmõ pääl.
S´oo_ks mi kõrralda kõnõli,
jutu_ks as´anda ai -
kinä olõ-i iks elo kesä pääl,
nopõ_ks olõ-i elo nurmõ pääl!
Kui lastas iks ninniniidü pääle,
lastas iks Piusa perve pääle,
hüä om iks ninniniidü pääl,
pääle Piusa_ks perve pääl,
hüä_ks sääl ollaq karjaga,
kallis keerdäq kiräga:
om iks sääl hüä hainakõnõ,
kallis iks kar´a söögikene!
S´oo_ks ma kõrralda kõnõli,
jutu_ks ma as´anda ai,
et om iks hüä hainakõnõ,
kallis hot´ iks kar´a söögikene.
Miä_ks nopõ nurmõ pääl,
miä_ks kinä kesä pääl,
miä_ks suurõ söödü pääl?
Kinä_ks süük kesähain,
makus´ iks süük maahain,
söödü_ks-hain süüdäv.
Süü_ks, kull´a kar´akõnõ,
maidsa_ks, meelimar´akõnõ,
süü_ks, kari, söödühaina,
laku_ks, kari, laanõhaina,
maidsa_ks, kari, maahaina;
otsku-i, kari, orashaina -
oras-iks-haina ohulinõ,
karits-iks-haina kah´olinõ,
oras-iks-haina otsa tege,
karits-iks-haina kaala lõikas!
Süü_ks, kari, söödühaina,
laku_ks, kari, laanõhaina,
söödü_ks-hain süüdäv,
laanõ_ks-hain lakutav!
Süü_ks kõttu täüs kui kõdõr,
maidsa_ks mago, kui oll´ mari,
mingu-i kodo müügih,
tarõ ette tänniteh!
Kotoh iks um kuiva ruhi,
tarõ_ks iih tahheq pangiq -
olõ-i_ks haina haarijat,
kallist iks vii-kandijat,
olõ-i_ks haina havvutajat,
lamba_ks-haina leotajat.
Neio_ks-kõnõ noorõkõnõ!