14. Õhtu tulles põllul.

SL 998.
H, Setu 1903, 211 (101) < Helbi k. - Jak. Hurt < Miku Ode (1903).

Meele_ks tulõ õdagukõnõ,
meele_ks hällüs hämäräkene.
Õtak iks tulõ mi õnnõst,
hummok iks tulõ mi hoolõst:
õtak iks latsõq kokko kuts,
lugõ_ks luidsaq kätte,
arvas iks anomaq ette,
tulõ_ks õtak mi õnnõst.
Õdagut iks umma imme,
hummogut iks ämmäkut -
hummok aja latsõq hulk´ma,
aja_ks latsõq laokalla!
Kae_ks, ma kae meelestäni,
kae_ks ma meele poolõstani:
päivä om iks mari-madalah,
linnu om iks ligi õdagut -
rühkigeq_ks mi, rutakõq!
Rühke_ks mi põldu kokko panda,
armas iks põldu kokko aiaq,
rühkige_ks, rutakõq,
angõ_ks mi kärro käsile,
hüvvä_ks sõnna sõrmilõ!
Käugõ_ks, käugõq, käekeseq,
sõudkõ_ks, kulla sõrmõkõsõq,
lasku-i_ks, sõrmõq, sõimada,
sõrmõ_ks-kundiq, kur´otõlla,
lasku-i ti vannu, käevarrõq!
Kuulõq sa_ks, peenü peremiis,
kaalu_ks sa nurmõ kaema,
tulõq sa_ks vako vaht´ma -
agu tii_ks mi tüü tihkõhe,
põllu panõ mi_ks kokko paganahe?
Kas iks tehnät mi tüüd,
võtat iks vasta mi vaiva?
Kui_ks tehnä-i mi tüüd,
võta-i vasta mi vaiva,
sys mi_ks tulõ-i tõõsõ kõrra,
astu-i tõõsõ aastaga!
Meile sys iks suuhtõ sutidaq,
meele_ks kätte kärädäq,
naaku-i_ks peräh penätämmä!
Kuulõ_ks sa, peenü peremiis,
pikä_ks hoolõ pitäj!
Anna_ks mi tenno jumalallõ -
ärä_ks mi tei tükü tüüd,
panni_ks mi kokko pala maad,
naaku-i suurõst suditamma!
Ooda_ks jäl, kulla pääväkene,
viidä_ks, päävä veerekene!
Jõudsõq sa_ks tullaq, jõvvat minnäq,
jõvva-i mi jõvvõ tüüd tetäq,
jõvva-i mi laapiq lak´a vällä!
Ooda-i mi päivä minevät,
ooda-i mi villu veerävät,
ooda_ks mi põldu lõpõvat,
osa_ks otsa minevät.
Anna_ks mi tenno jumalallõ -
saa_ks mi viirde põllulõ,
saa_ks mi otsa osalõ,
peio päst iks mi jalaq pindrest,
kasa päst iks mi jalaq kammitsast.
Anna_ks mi tenno jumalallõ -
pässi_ks mi varra vallalõ,
aiksahe astma,
saa_ks no, kullaq, umma kodo,
saa_ks mi, mar´aq, umma majja.
Päivi_ks-lisil päiv pikk,
näüdsikil iks nätäl pikk,
sulasil suvi pikk -
selle_ks mi ooda õdagut,
ooda_ks mi villu veerüvät.
Õtak iks tulõ mi õnnõst,
hummok iks tulõ mi hoolõst.
Õdagut iks umma imme,
hummogut iks ämmäkut -
õdak iks latsõq kokko kuts,
lask iks latsõq lavva mano,
arvas iks ette anomaq,
lugõ_ks ette luidsaq.
Neio_ks-kõist noorõkõist!