26. Teolaulud.

SL 1036.
H II 32, 348 (6) < Setumaa - Fr.Kõiv (1891).

Milles, milles herräq joos ilosaq,
milles, milles provvaq joos punatsõgi?
Vaestõ-, vaestõlastõ joos vaav´a läbi,
tütär-, tütärlastõ joos tüü läbi!
Tulgõq, tulgõq vällä joos tooli päältä,
kaegõq vaesõ joos valla pääle,
kuis sied valda joos vaivatassõ,
teopoissa joos pessetässe!
Kur´aq ommaq joos kelmiq kiltreq,
petjäq peenüq joos pulgajunkruq -
selle joos herräq ilosagi,
selle provvaq joos punatsõgi!
Esimest salmijalga korratakse lauldes.

SL 1037.
EKS 4° 4, 160 (30) < Räpina, Veriora v. - J.Kotli < Tsia Ann (1877).

Lätsi ma tiid tetenä,
mõisa poolõ mõtõldõna,
panni ma koti koera sälgä,
esi istõ hiire sälgä.
Kubjas keppi kergüteli,
mina päädä nõrgutõli.
Kubjas kopõrd mino poolõ,
mina, maamees, mõtsa poolõ.
Tõie ma merest mitu kalla,
laajast järvest latikita
kubijidõ kurgu võida,
kilderide keele kasta -
sis and´ aigo atra köütä,
vanno vankri[t] parandada.

SL 1038.
H II 32, 827 (9) < Räpina khlk. - J.Poolakess (1889).

Kubjas, kullõ-lullõkõnõ,
kiltre, kiilo-viilokõnõ,
laskõq vaesõq vallalõ,
õnnõtuq õdangullõ!
Õtak tulõ mi küläle,
vilu veerüs vainu'õllõ:
õtak naas´ kodo kutsuma,
vilu majja viimä,
hämmär majja häälimä.
Ei ma lääq õdagu kutsõh,
vilu majja viiäneh -
tulgu perrä hellä velle,
hellä velle, kulla velle!
Mis saa teo teenimisest,
abi päivä astumisest?
Ei andaq tarrõ saja saista,
pinki peio istaskõlla -
suur süüt söögilaud,
põllupinnär istõpink!

SL 1039.
H I 10, 203 (2) < Vastseliina khlk. - J.Sandra < Jaan Toll (1896).

Lätsi ma teolõ tiiratõh,
osa mano uuratõh.
Panni koti koira sälgä,
leeväkoti lehmä sälgä,
esi ma istõ hiire sälgä,
katsiratsala kassi sälgä.