1. Tulgõ nuuta, noorõq meheq!

SL 1043.
H II 32, 822 (3) < Räpina khlk. - J.Poolakess (1889).

Muuq kitiq muuda maada,
avvustõlliq aromaada,
minna umma järvekeist,
kallist kalarannakõist.
Kiisaq mängeq kivi pääl,
vähiq väänästä kõnõliq:
"Tulgõq nuuta, noorõq meheq,
võrku, Võnnu poisikõsõq!
Püüdkeq kallo kullatsit,
hõbõhando havvõkõisi,
kuldaluuda lutsukõisi!
Viigeq müügis müürü pääle,
kaubas kaalulavva pääle,
kutskõq herräq kaema,
imändägi imehtämmä,
mis oll´ müügist müürü pääl,
kaubast kaalulavva pääl!"

SL 1044.
EKS 4° 4, 128 (4) < Räpina, Mehikuurma - J.Kotli < Veetska naane (1877).

Muu_ks kitiq muuda maada,
avvustõliq aromaada,
mi_ks umma järsko järvekeistä,
salo säksa saarõkõista.
Kiisaq kisendiq kivi päältä,
vähäq väänästä vastasiq:
"Tulgõq noota, noorõq meheq,
võrgulõ, Võnnu poisikõsõq!"
Püüdkeq kallo kaunisita,
kuldaluuda lutsusita,
hõbõhando havvõsita,
särävidä sär[g]esitä,
lak´o ja lapikit latikit,
armsit ja ausit angõrjit!
Viigeq müügis muilõ mailõ,
kaubas kaugõ kaaludõlõ!
Tulõvaq ostjaq otsimaie,
imändäq imehtelemäie,
priskiq preiliq pettemäie.
Säält mino veli rikkas saie,
kalapüügist kassu kaivse.
Veli pand´ sõsarõ sõudõmaie,
tsids´o vettä viskamaie:
"Sõvva_ks, sõvvaq, sõsarõkõnõ,
sis saat sõlõ sõudõmasta,
helmeq vettä heitemästä!"

SL 1045.
EKS 8° 4, 146 (26) < Räpina, Kõnnu k. - J.Jagomann < Liisa Samuilov (1877).

Tulgõ_ks nuuta, noorõq meheq,
võrku, Võnnu poisikõsõq!
Võtkõ_ks nuuta nulga päält,
sadasilmä saina päält,
laskõ_ks sisse häältä puulta -
agu_ks juhus jurlakita,
putus havvõpurlakit,
kulda-saasõ_ks-luuda lutsukõisi,
hõbõhanda havvõkõisi,
vaskisälgä särekeisi!
Lutsuq naksiq luud liigutama,
säreq naksiq sälgä sirotama,
havvõq handa höörütämä.
Sis viidi_ks müügis müürü pääle,
kaubas kaalulavva pääle.
Ärä poodi punnanaglaq,
ärä kaki kaalulavva.
Kiisaq_ks lauliq kivi päältä,
vähiq väänästä kõnõliq:
"Nuuta, [nuuta,] noorõq meheq,
võrku, Võnnu poisikõsõq!"