16. Mineq üle, vihmakõnõ!

SL 1081.
H II 4, 148 (60) < Lobotka k. - Jak.Hurt < Maarja (1886).

Vihmakõnõ, velekene,
sagarikku, mu sõsarõ!
Ega mullõ_ks vihmast veljä saaq,
sagarikust mu sõsarda.
Viromaalõ mineq, vihmakõnõ,
Saarõmaalõ, saokõnõ,
kavvõndõhõ kalaranda -
viländ om vihma mi vil´olõ,
viländ mamma mi mailõ!
Är om vesi meil viläq võtnuq,
päävä orasõq pälgänü.
Viromaalõ, vihmakõnõ,
Saarõmaalõ, saokõnõ!
Viro näidiseq unidsõq,
Saarõ näioq sadõjatsõq,
suvõ om näil suu mõskmada,
talvõ tarõ pühkmädä:
olõ-i näil vett suu mõskõ,
olõ-i vett tarõ pühki,
vihma oodiq nääq suud mõskma,
tuult tarrõ pühkmä!
Viromaal ommaq viläq kuiva,
Saarõmaal sannaq palasõq!

SL 1082.
EKS 8° 4, 381 (3) < Räpina, Kõnnu k. - J.Jagomann < Okse Tanilovits (1877).

Jummal, viiq vihma Vinnemaalõ,
sagarikko Saarõmaalõ -
Vinnemaal vihma oodõti,
sagarikku salliti:
Vinnemaal iks viläq kuiosõq,
Saarõmaal sannaq palasõq!
Meheq sääl mustaq, naaseq laas´aq,
tüterikoq tümätedüq,
poosiq kannukarvalisõq,
latsõq ahoarvolisõq.

SL 1083.
H I 8, 368 (17) < Vastseliina khlk. - J.Sandra < Mari Lõiv (1896).

Vihmakõnõ, mu velekene,
saokõnõ, mu sõsarõkõnõ,
ar sa minno likõs tekuq,
kastku-i kuiva kar´alast!
Olõ-i mul koto, koh ma kuio,
olõ-i tarrõ, koh tahenõ -
kodo mul kuiva kuusõ all,
tarõ tammõ lehe all.
Veerüq, vihma, Vinnemaalõ,
sõvvaq, sado, Saarõmaalõ,
vinne neiuq vihma uutvaq,
saarõ neiuq sadõmit:
suvõl suu mõskõmista,
talvõl taarilõ leemestä.