17. Saisaq, armas saokõnõ!

SL 1084.
H II 4, 149 (61) < Lobotka k. - Jak.Hurt < Maarja (1886).

Oodaq, oodaq, merekene,
kannatõlõq, kalaranda,
piäq kinni, pilvekene,
saisaq, armas saokõnõ!
Lasõq meil kuivalt kodo minnä,
tahehõlt ese tarrõ!
Kotost iks tulli udsukuivaq,
udsukuivaq, lumivalgõq,
kodo_ks lää vesihämmeq,
vesihämmeq, linalikõq!
Olõ-i meil kotoh umma imme,
kiä mul hämme päält päst,
kalõ kuiva sälgä kolk´.

SL 1085.
EKS 8° 4, 382 (4) < Räpina, Kõnnu k. - J.Jagomann < Okse Tanilovits (1877).

Vihmakõnõ, velekene,
sagarikko, sõsarõkõnõ,
lasõq sa_ks kuivalt kodo minnä!
Neiokõnõ noorõkõnõ,
kui ma_ks kuivalt kotost tulli,
kotost ma_ks tulli rusukuiva,
rusukuiva, lumivalgõ -
kodo ma_ks lää linalikõ,
linalikõ, vesihämme!
Neiokõnõ noorõkõnõ,
olõ-i mul kuiva kolkijat,
hämme päält pästijät.
Neiokõnõ noorõkõnõ,
kõgõ ma naksi kuud kumardama,
ako armast pallõma -
kuu mul iks kolgõ, päiv paisti,
ago aialõ aroti,
täht saadi saiballõ.