26. Orja kaebdus üleüldse.

SL 1185.
H I 8, 369 (22) < Vastseliina khlk. - J.Sandra < Mari Lõiv (1896).

Küll ma tiiä or´a elo,
or´a elo, vaesõ vaiva,
kui sääl or´ah oltanõssa,
käskijaluh käüdänessä.
Or´a elo ohõlinõ,
or´a puhkus puhkõlinõ:
ori maka orrõ pääl,
palgalinõ parrõ pääl.
Kui sii orsi helähtie,
kui sii parsi paan´ahtie,
sis oll´ otsah or´a uni,
pagõsi palgalisõ puhkus.
Or´a uni ohukõnõ,
ohukõnõ, ohkõlinõ.

SL 1186.
H I 8, 365 (4) < Vastseliina khlk. - J.Sandra < Mari Lõiv (1896).

Olli or´ah, käve kar´ah,
suvõl meeste sulasõh,
talvõl naistõ näädsikuh,
keväjä kirvõs olala,
talvõl kangas kaala pääl,
suvõl viile vikahtit,
talvõl vokki trallatõli.

SL 1187.
H, Wiedemann 1, 316 (5) < Võrumaa - V.Steini abiline (e.a. 1887).

Ori maka orrõ pääl,
vaenõlatsi varva pääl.
Johus orsi liigatama,
raudavarva rappumaie,
sys om orja uni lännü,
vaesõlatsõ valvaminõ.