18. Rikaste pilkamine.

SL 1258.
H, Setu 1884, 503 (6) < Lasarevo k. - Jak.Hurt < Melähnüvä Hedo (1884).

Rikkit iks uhkit,
varaliisi_ks, vaivo nynno!
Toodi_ks meid rikkaq riis tetäq,
kõrk´ toot´ tetäq kõdarist.
S´oost oll´ no jummal häste tennü:
rikkaq toot´ puutaq purdis -
või-s no rikkaq riis tetäq,
kõrgiq tetäq kõdarist.
Sünnü-i mi rikastõ rinna pääle:
rikas toot´ iks rindo põrotada,
kõrgiq toodiq lüvväq kõrva pääle.
Karksi mi_ks kar´ustõ sisehn,
öüdiliste ümbrel.
Rikkita_ks uhkita,
varaliisi, vaivo nynno!
Terä- näil iks -kotiq tegiq kiräq,
jahu-näil-matiq massiq palga,
tiidse_ks esä teräsalvõq,
jahumatiq massiq rätiq.
Vaesida, vaivaliisi -
kiräq ommaq umaq kirotõduq,
ega_ks meil tii-i teräkotiq!
Hot´ iks mi panni paklatsõl,
hot´ iks mi lasi laasikatsõl,
syski olli mi iloh edimätseq,
laulu- olli mi -kiräh keskmätseq,
iloh iks olli iihvõtjani!

SL 1259.
EKS 8° 4, 244 (33) < Räpina, Kõnnu k. - J.Jagomann < Okse Tanilovits (1877).

Neiokõnõ noorõkõnõ,
tulli ma_ks üles hummongulla,
varra inne valgõ'õt.
Meä mul iks huul hummongul,
koa murõh inne muid?
Suur mul suu mõskõminõ,
katõ jala käng´mine.
Läpe-s ma otsiq ojavett,
läpe-s kaiaq kaavovett,
mõsi_ks suu silmäviil,
lasi sarnalainil.
Seeni_ks vaenõ lehmä nüssi,
lehmä nüssi, leevä kasti,
kar´a_ks saadi ärä mõtsa,
kunni_ks suurõq suid mõsiq,
rikkaq rindo puhastiq.
Mingu-i tüllü suurdõga,
tükkü-i riido rikastõga -
suur pand iks suuhu sillapuist,
rikas kõivopurdõhist!