22. Türgü sõtta!

SL 1265.
ÕES, V.Stein 1, nr. 80 < Lindsi k. - V.Stein (e.a. 1872) ja H II 62, 712 (80).

Mis tuu kiri kittänessä?
Kiri kitäp suurta luku,
suurta sõta, lastõ luku:
säidsekümmend säidse vanna ts´urra,
säidsekümmend säidse vanna tütrikku
saavaq reedi kokko kutsutus
Otsa-Märdi ussõ-aida,
koh kuut süldä kuusinõ tuba,
säidse süld saarinõ laud seen,
kats kanni lavva pääl,
üts tühi, tõisõn mitte midägi.
Säidsekümmend säidse vanna ts´urra,
säidsekümmend säidse vanna tütrikku
peäväq polguna minemä
Türgü kuninga vasta tõukama,
kedä tauds ei küünüq tapma,
ega surm ei jõvvaq võtta.
Otsa-Märdi ussõ-aian
saap sis neile särki antus:
kuusõkoorõst kuldaküpär,
haavakoorõst hahka särki,
kõo-s´olgasta muu särki,
emälepäst höäq leheq.
Söögiq saa ja joogiq saa:
külümüt saa kitsõ-upõ,
poolõ vakka lamba-pobulit;
mis kits kurnap, viina-moonas,
mis hobo laarip, ollõ-moonas;
kala-moonas aga andas,
mis alt mättä kikst-kakst,
mättä pääl lätt huska-haska.
Mis näile mõõgas puusa pandas,
mis näile püssäs pässä andas?
Leivälapjo mõõgas andas,
ahjoluuda püssäs pandas.
Säidsekümmend säidse vanna ts´urra,
säidsekümmend säidse vanna tütrikku,
nii nemäq saavaq tulõva reedi
vasta Türkü veeremähe.