24. Lippi lappi liidetud riismed.

SL 1269.
H I 2, 676 (7) < Räpina khlk. - G.Narusk (1889).

Mis ti hiilit, hintsosilmäq,
mis ti vahit, varsasilmäq?
Hiilit ilma ilosita,
vahit ilma valusita -
illos´ sai ilma hiilimätä,
vali ilma vahtimata.
Mis ti ikõt, ehtekeseq,
puhut, suurõq puutõkõsõq?
Kodo no jäässiq, poiss ei jätäq,
mehele läässiq, miis ei võtaq!
Oh mu innist elokõista,
kallist kasvopõlvõkõista,
kui ma no olli esäkotoh,
viirdü vele põrmandoh!
Esä hõõgas´ hellätenäh,
imä no hellä tütteristä,
muu pereh moromunast.
Panni no puu purdõ'õst,
vitsaladva veerikosta,
olõkõrrõ kõnnikusta:
"Etsa tandsiq, tammõkõnõ,
kõnniq, olõkõrrõkõnõ,
veeriq, vitsaladvakõnõ!"
Es saaq no tammõl tantsitusta,
olõkõrrõl kõnnitusta,
vitsaladval veeritüstä.
Kes pand no tammõ tantsimahe,
olõkõrrõ kõndimahe,
vitsaladva veerimähe?
Oh ti ulliq noorõmeheq,
pahatargaq talopojaq,
küll ti kõnnit kümme küllä,
sandit sada tarõlävve,
otsit ilma-ilosita,
vahit ilma-valusita!
Pojakõnõ helläkene,
ärä sa no võtkuq liinast naist,
alõvista hatakõista -
liinan ommaq liina litsiq,
alõvina hatakõsõq!
Võtaq vallast vaenõlatsi,
sii om kenä ketteremä,
vali vokki sõkkõmahe!

SL 1270.
H I 8, 418 (6) < Vastseliina khlk. - J.Sandra < Kristin Raudpuu (1896).

Oh ti ulliq noorõmeheq,
taiulda talopojaq!
Toetsõq ti puusta naista tetäq,
taropakust tahoda,
panniq kulda palgõhõs,
hõpõ iä ilossa -
kuld sulas soola maitsõh,
hõpõ hõõrus hõlma võttõh,
jääs kuld jäle pääle,
satas hõpõ sam[m]u pääle.
Olli mul üts väiku vell´o,
esi till´o, esi terävi.
Tuu hõpõ maast võtte,
kulla sai sam[m]u päältä,
vei hõpõ sepä kätte,
kulla ravvarähnile:
"Tiiq, seppä, tilkaq, seppä,
tiiq tsõdsõl tsõõrisõlgõ,
minijäle meelitelge,
minka kävvüq käletsile,
minka sõudaq sõsarilõ,
minka oiuq umatsilõ,
minka veerdäq velitsile!"