13. Vüü kudaminõ.(Ilo lihasöögi aigu).

SL 1334.
H, Setu 1903, 338 (7) < Obinitsa k. - Jak. Hurt < Mihkali Matr´o (1903).

Üts naistõrahvas um imä, kel tütreq. Timä istus, [kuda vüüd] ja laul:
Kua vüüd koogulist,
haara vüüd hangulist.
Imel pall´o tüterit.
Um iks pall´o, kohe pandaq,
um liiga, kohe liitaq?
Olõs´ kos´aq kost tulõsiq,
olõs´ viinaq kost veeräsiq,
ärä üte ma annasiq,
kats tükkü kaalutasiq,
poolõl toobil ma müüsiq,
katõl klaasil kaotasiq!
Kos´aq tulõvaq, rikkaq kos´aq, joovaq viina. Kosilanõ kynõlõs: "Ma tulli tütärd kosima!" Imä küsüs: "Kuvva tütärd?" Kosilanõ kost: "Annõ nimelist." Imä: "Midä tüüs annat?" Kosilanõ: "Panõ kirjo kirotamma ja pillu pilutamma." Imä: "Midäs tälle süvvä annat?" Kosilanõ: "Säksa süüki süvväq ja säksa juuki juvvaq." Imä: "Kohes tä magama panõt?" Kosilanõ: "Koti pääle ja pad´a pääle panõ magama." - Nüüd ütles imä: " Mineq är! Anna-i! Olõ-i mu tütreq nii harnuq!" - Imä võta-i rikast kosilast.
Imä laul jäl niisama kui innegi. Tulõvaq vaesõq kos´aq, joovaq viina. Kosilanõ: "Ma tulli tütärd kosjollõ." Imä: "Kuvva tütärd?" Kosilanõ: "Annõ nimelist." Imä: "Midä tüüs annat?" Kosilanõ: "Panõ lambalauta laulatamma." Imä: "Midäs tälle süvvä annat?" Kosilanõ: "Kesvä kihukõist, kaara kahukõist." Imä: "Kohes tä magama panõt?" Kosilanõ: "Tsiapahta magama." - Vaesillõ and imä tütre är ja ütles: "Mu tütär um tuud tüüd ja süüki harinuq."
Rikkaq lääväq paha meelega ja vannusõq, et kyik tütreq kodo jääsiq:
Jääguq kodo kuvvõs suvõs,
viies suvõs velitsille!
Jääguq kodo kogonis
ja velitsille viimätses!
Imä kost vasta:
Jääki-i kodo ei sukugi,
mina anna viimädseq!
Tulõvaq ka viil tõsõq, kolmandaq jne. kos´aq, niipall´o ku imäl tütrit um, edimält iks rikkaq kos´aq, sys vaesõq. Ilokõrd ja laulusynaq ummaq egäkõrd sääntseq samaq ku innegi. Kunagi anda-i tütärd rikkallõ kosilasõlõ, iks saa vaenõ. Kui viimne tütär är um ant, um ilo otsah.