10. Mõrsjat kahitsetakse.

SL 1424.
H II 4, 243 (104) < Treski k. - Jak.Hurt < Hemmo, Ivani naane (1886).

Sysarõni armõhõni,
mino meelimar´akõnõ,
edo_ks sino meelekene,
sino pääs´o pääkene!
Kiä ande sul meele är minnäq,
and´ julu är juvvaq?
Kas iks sinno ese anni,
ese anni, ime panni,
vai sul vell´o viina jõie,
vai lätsiq sa umalõ meelele,
pääs´o umalõ pääle?
Edo sa johut joodikullõ,
edo saat saadikõllõ,
putut viinapruukjallõ,
saat sa kõrdsikõndjallõ,
viina mano viirdjälle?
Jummal tiid iks jumalakõnõ,
Mari tiid iks madalakõnõ -
ku_ks sa saat ülä kodo,
kallut kasa vanijallõ,
ülä lätt iks ussõ kaema,
kõõ_ks tä näiolõ kõnõli,
kõõ tä mar´alõ manitsõlli:
"Tii_ks sa tii tiigi poolõ,
ajaq jäleq järve poolõ!"
Esi tä kõnnõ kõrdsi poolõ,
esi veeri viina poolõ,
silmäq täl kõvõraq kõrdsi poolõ,
nyna virril viina poolõ.
Jummal tiid iks jumalakõnõ,
Mari tiid iks madalakõnõ -
ehk veese_ks tä liina linige,
veese kõrtsi kõrigõ,
veese puuti pallapoolõ?
Edo_ks sinno näiokõist,
sinno meelimar´akõist,
edo su hüvvi hammit,
edo kinn´o kir´oliisi!
Ku_ks sa olliq näiokõnõ,
üles kasviq kabokõnõ,
vell´ol olliq pikäq linapõlluq,
lajaq olliq jo linalaotusõq -
anna-s tä punda poolikut,
anna-s nakla narritut,
and´ iks tä kolkmit kor´ada,
and´ kiuda kinnitellä.
Kui tä liigõ liinosihe,
kui tä tougas´ turu pääle,
sys tõi tä kurstõ kumakit,
tõi matsa maagõlanga.