9. Laul vaesele mõrsjale.

SL 1423.
H, Setu 1903, 104 (50) < Helbi k. - Jak. Hurt < Miku Ode (1903).

Olt iks sa valla vaenõlats,
olt kolga kurvalinõ.
Küünü_ks sinolt küsümä:
keä_ks sinno ehitelli,
keä_ks kabo kabostõlli?
Kui tulli suur suvõkõnõ,
tulli_ks kinä keväjäkene,
lill nakas´ iks puuh liikma,
nakas´ iks puu punõtamma,
Eessu_ks puid ehitelli,
Maarja_ks maalõ mar´apuid -
keä_ks ehit´ sinno, neiokõist,
keä kabist´ sinno, kabokõist?
Olt sa valla vaenõlats,
ilma olt iks sa imäldä kananõ -
ese olt iks sa, neio, ehitelläq,
ese olt iks sa, kabo, kabostõllaq.
Kuulõ_ks sa, tsõõri tsõdsõkõnõ,
mõista_ks sa, meelimar´akõnõ -
jummal pidi_ks hoolõ vaesõst,
Maarja kand´ iks kõrra kahjolisõst:
Essu_ks vaesõ ehitelli,
Maarja_ks kabist´ kah´olitsõ,
ehit´ iks ilmailosast,
pääde päävävalusast.
S´oost um iks jummal höste tennü,
Maarja_ks maalõ kirotannu:
kirot´ iks vaesõ valusa,
ikulitsõ ilmailosa.
S´oost oll´ iks teno jumalallõ,
au_ks maalõ Marijallõ:
umma_ks neioq vaesõq valusaq,
ikulitsõq ilma-ilosaq!
Rikkit iks uhkit,
kullakandjit korgit -
söödeti neid iks sõirasuurmil,
peeti_ks piimäpäälsil,
saa-s iks rikkaq ilosaq,
varalitsõq valusaq!
Vaesit iks valusit,
tinarindo terävit!
S´oo_ks ma ütle ni kynõlõ:
minga_ks vaesit söödeti,
söödeti, joodõti?
Seiq iks pütski palo päält,
jõiq iks vett vitsistüst,
selle sai_ks vaesõq valusaq,
saiq iks ilma-ilosaq.
Kuulõ_ks, mu kulla sysarõni:
jummal pidi_ks hoolõ vaesõst!