29. Tädimehele. A.(Pulma kutsudes.)

SL 1513.
H II 3, 41 (26) < Setumaa - H.Prants (1889).

Tädimehekene mu armakõnõ,
tädimehekene mu kallikõnõ,
väräq ummaq sul rampi raotuq,
koputõtuq kuldarõngihe -
mullõ tulõq sa värjo väänmä,
tulõq laidu laskma!
Umaq väräq väänäq valingitsõq,
lasõq laiaq langassitsõq,
võtaq sa hiiro suu veerest,
suurõq ruunaq suitsist,
uma viiq sa tsõõrilõ morolõ,
uma vaha-vanijallõ!
Ku ma käve inne ellehnäni,
käve, kabo, kasvuh,
sis ma ooda-s värä väänjät,
ooda-s laia laskjat.

SL 1514.
H II 4, 62 (22) < Laossina (Liiva) k. - Jak.Hurt < Parasko, Ignatsi naine (1886).

Tädimehekene mu armakõnõ,
tädimehekene mu kallikõnõ,
mullõ nakaq sa_ks saaja saama,
kabolõ saaja kalduma!
Tuud iks sa pelgü peläku-i,
tuud iks sa väega värisku-i:
ega sinno ma ei ajaq alaotsa,
sää-i sinno sängü pääle!
Sino saasõ_ks pido peränulgah,
asõ saasõ sul ala aknidõ
kuvvõ kruudi kottal!
Ese um iks mul vanuhut väsünü,
umma om iks tä töödä orjunu,
ese jõvva-i mul iks saaja saata,
kasutaja mul iks kõrda kanda -
klaas võtaq sa_ks umma kätte,
pikre võtaq umma pejjo,
tädimehekene mu kallikõnõ!