30. Tädimehele. B.(Sajapäeval.).

SL 1515.
H, Setu 1903, 66 (30) < Helbi k. - Jak. Hurt < Miku Ode (1903).

Tädimehekene_ks mu armakõnõ,
suurõ ütle ma_ks süü sino pääle:
mille sa minno_ks kutsma kutsu-s,
mille sa minno_ks vasta võta-s?
Kyik iks kitiq keväjät,
avvustõlliq aastakka,
sina ait iks kehväs keväjät,
halvast sedä aastakka!
Tädimehekene_ks mu armakõnõ,
hot´ iks sa kutsma kutsnuq,
minno_ks sa vasta võtnuq,
ti saanu-s ma kodo kutsma,
velile ma_ks synna viimä -
neio, läpe-s ma umalta tüültä,
armas, argnõ-s umalt asklõlt!
Tädimehekene_ks mu armakõnõ,
suurõq olli_ks kyik tüüq tegemäldä,
pikäq olliq mul iks hoolõq pidämäldä -
neio anti ma_ks üli-äkitsel,
panti_ks ma paha-palaval:
ütel iks kuul kositigi,
tõsõl iks neio antigi.
Kuna olõ-s iks mul aigu minnäq,
eka olõ-s iks aigu astuq,
kulla_ks, minnäq ti kodo,
mar´al iks minnäq ti majja,
ti_ks kodo kutsma,
astuq synna andma!
Neiol oll´ iks aigu veitkese,
kabol oll´ mul iks aigu kasinahe:
ülä anni_ks aigu veitkese,
kasa anni_ks aigu kasinahe -
kutsma es saanuq ti kodo,
synna viimä velisille!
Tädimehekene_ks mu armakõnõ,
s´oost olõq sa_ks terveh, ait´umma:
mullõ sa_ks saaja saiq,
kabolõ_ks saaja kalduq,
au- tulli_ks -olt juuma,
leeme- tulli_ks -leibä süümä!
Esi olt sa_ks kotost korgõst,
elämisest ilosast,
eski um teil iks ollõq umah kotoh,
mõtu um teil iks umah mõisah -
au- olõ-i_ks -olt tettüt,
leeme- olõ-i teil -leibä küdsetüt,
meil iks ummaq au-ollõq,
au_ks-ollõq, leeme-leeväq!
S´oost olõq sa_ks terveh, ait´umma:
mullõ_ks ti saaja saiq,
kabolõ ti_ks saaja kalduq!
S´oost olõq sa_ks terveh, ait´umma:
eka ti es piäq pikkä vihha,
kanna-s kalgõ süänd!
Ti saa-s kodo kutsma,
velile_ks ma synna viimä -
mullõ_ks sa saaja saiq,
kabolõ_ks saaja kaalduq,
hot´ käu-s ma kutsmah kuvvõkese,
synna käu-s ma viimäh viiekese,
neio_ks, ma ütsindä kutsi,
kabo, ma_ks kutsi katõla käelä.
S´oost olõq sa_ks terveh, ait´umma,
kallis olõq sa no kavva elämä:
jää-s iks kodo kullakõsõq,
jää-s majja mar´akõsõq,
mullõ iks är saaja saiq,
kabolõ iks saaja kaalduq!
Tädimehekene_ks mu armakõnõ,
tädimehekene_ks mu kallikõnõ!