49. Pillimehele. A.(Pulma kutsudes.)

SL 1559.
H III 29, 931 (13) < Setumaa - M.Evert < Juuli Pille (1901).

Velekene_ks armakõnõ,
velekene kallikõnõ,
neio, lää_ks ma sullõ lähkulõ,
kulla, sullõ kottalõ!
Sullõ tiiä-i ma kuigi ikkõq,
kulla, kuigi kumardõllaq -
kas ikkõq nu sinnu esändäst,
vai papista pallõlda?
Velekene_ks armakõnõ,
velekene kallikõnõ,
sullõ oppa ma_ks üte oppusõ,
taha anda tõista tarkut:
ärä löögu-i_ks sa kannõld kaasikilõ,
pilli pido pidäjile -
kannõld lüüq iks kaejilõ,
pilli_ks nu peräh-tulõjilõ!
Velekene_ks armakõnõ,
velekene kallikõnõ,
nu kuulõ_ks mu kumardaminõ,
miilde panõq mu pallõminõ:
velekene_ks armakõnõ,
velekene kallikõnõ,
ega_ks ma sullõ huupi ütle-i,
ega kõrralda kõnõlõ-i!
Velekene_ks armakõnõ,
velekene kallikõnõ,
pääle painu_ks ma sinnu pallõma,
heidä hellile sõnolõ:
hummõn nakas mul saaja sõitmahe,
nakas vakka valamahe,
mullõ naka_ks sa saaja saamahe,
naka_ks vakaga valama!
Velekene_ks armakõnõ,
velekene kallikõnõ!