17. Taheta-i naistõ tandso.

SL 719.
A: SKS, Veske-Stein nr. 127 < Vymmorski k. - V.Stein (e.a.1872).
B: ÕES, V.Stein nr. 4 ja H II 62, 653 (4).

A. (Algupärane üleskirjutus):
Pill oll´ helle pedäjäne,
kannõl kummõ kadajanõ,
neiu helü helehep,
neiu kumu kumõhõp.
Panni pilli piitskumahe,
kandõlõ kaemahe -
neiu helü helehep,
neiu kumu kumõhõp.
Ärä petse pilli helü,
kati kandlõ kumõhõ!
Kui ma mustõ noori olli,
sys oll´ helü helehep,
[olli] kurku kumõhõp.
Kui ma, vaenõ, vanas jäi
ja inneaigu ilotus,
lätsi hääli ilotust.
Inämb lää-i laulu ladusahe,
ja [lää-i] ilo ilosahe.
Taheta-i naistõ tandso,
kaeta-i naistõ kargust -
neiu tandso taheti,
neiu illo ihati,
kaeti neiu kargust:
neiu ilo ilosap,
neiu muudu muudsap!
Om iks hüä herra elo,
kallis elo kaubamehel.
Neiukõsõq noorõkõsõq -
kohe tahtsõ, sinnä tandsõ,
kohe lätsi, ni läbesi.
Nüüd iks hooli ussõ päälä,
murõh musta parrõ päälä.
Kiä võtt´ hoolõ ussõ päält?
Ime võtt´ hoolõ ussõ päält.
Neiukõsõq noorõkõsõq,
piä-s kinni pümme üü,
kaidsa-s vasta vallus´ taivas!
Neiu hot´ kiri kikkani,
valgõhõni vallatõlli,
ega pia perrä tulda-s,
ega varra vaja haarda-s!
Naasekõisi noorõkõisi -
noid iks varra vaja haarti,
pia perrä otsiti.
Selle_ks pia perrä otsiti,
varra vaja haarti:
naasel ikiq ulliq latsõq,
piidsiq piimälinnukõsõq.
Selle noid varra vaja haarti,
selle_ks pia perrä otsiti.

B. (Pärastine ümberkirjutus):
Pill oll´ helle pedäjäne,
kannõl kummõ kadajanõ,
neiu hääli helehemb,
neiu kumu kumõhõmb.
Panti pilli puhkumahe,
kandlõ kummu lüümähe -
neiu hääli helehemb,
neiu kumu kumõhõmb.
Ärä petse pilli helü,
kati kandõlõ kumõ.
Kui ma muistõ noori olli,
olli hääli helehemb,
kurgu kumu kumõhõmb.
Nüüd mu veri vanas jäänü,
illos igä ilotus,
lää-i laulu ladusahe,
inämb ilo ilosahe.
Taheta-i naistõ tandsu,
kaeta-i naistõ kargust -
neiu tandsu tahetassõ,
neiu illo ihatassõ,
neiu kargust kaetas:
neiu ilo ilosamb,
neiu muudu moodusamb!
Neiukõsõq noorõkõsõq,
kohe tahtsõ, sinnä tandsõ,
kohe lätsi, ni läbesi.
Imä võtt´ hoolõ ussõ päältä,
murrõ musta parrõ päältä.
Piä-s kinni pümme üü,
kaidsa-s vasta vallus´ taivas!
Neiu hot´ keeri kikkani,
valgõni vallatõlli,
ega pia perrä tulda-s,
ega varra vaja haarda-s!
Naasekõsta noorõkõsta -
taa iks varra vaja haarti,
pia perrä tä otsiti.
Naasel ikiq ulliq latsõq,
piidsiq piimälinnukõsõq,
selle tä varra vaja haarti,
selle tä pia perrä otsiti.