1. "Ristkäste" sõnumid tuuakse.

SL 1816.
H, Setu 1884, 30 (5) < Kran´tsova k. - Jak. Hurt < Darja Petrovna (1884).

Sedä_ks aigu ma ammu oodi,
ammu oodi, kavva kaie,
et üts uma oll´ oodussih,
oll´ mul kallis kaekih!
Tulli ma üles hummogul,
varra väiku valgõga,
heidi ma silmi sinnä poolõ,
kulla ma kaie tuu kodo poolõ -
näie ma sanna küdüvät,
tossu vällä tulõvat.
Heidi ma ette Eessu risti,
otsa pääle uma risti:
teno_ks olguq jumalallõ,
au armas Marijallõ,
nu_ks meil saa sanna-sõna,
nu_ks meil tulõ tuhu-sõna!
Kõõ_ks ma oodi kutsijat lävele,
sõna-andjat akõnallõ.
Tull´ mul kutsijas lävele,
sõna-andja akõnallõ,
sys ma_ks haari küsütellä,
küsütellä, nõvvatõlla:
"Kas iks tulli tuhu-sõna,
vai tulli Tooni-sõna?"
Ärä_ks tä lausi meelestäni:
"Teno_ks olguq jumalallõ,
au maalõ Marijallõ,
ega_ks ma tuu-s Tooni-sõnna,
ega kanna-s kalmu-sõnna,
ärä_ks ma tõie tuhu-sõna:
tulgõ_ks ti pito pidämä,
kallist kõrda kandõma!"
Naane_ks tuu noori naarahti,
mustakulmu muhahtigi,
naas´ iks vatsko val´atama,
nakas´ pess´mä piirakit.
Läts iks sinnä söömiselle,
söömiselle, joomisõllõ.