24. Ristiema nutab ristipoega.

SL 1879.
H, Setu 1903, 182 (85) < Helbi k. - Jak. Hurt < Miku Ode (1903).

Ristipojakõnõ_ks, mu kull´a ristipojakõnõ,
mille rühe_ks sa kalmu kalduda,
mille rühe_ks sa liiva liikuq?
Innep võinu_ks ma kalmu kalduq,
innep võinu_ks ma liiva liikuq:
mari olõ ma_ks vanõbakõnõ,
esi olõ ma_ks inäbä elänü!
Igä olli_ks sul segämälda [?elämäldä],
kallis olli_ks sul elo kasumalda -
võinu_ks sa inäbä elläq,
võinuq sa_ks kavvamba kassuq!
Ristipojakõnõ_ks, mu kull´a ristipojakõnõ,
mino olt iks sa meelimar´akõnõ,
olt iks sa hüä mino meelest,
kallis olli_ks sa mino kaekist!
Jummal tiid iks, jumalakõnõ,
mille tegi_ks sino kuri koolukõnõ,
mille tegi_ks sino kalgi kadsokõnõ,
mille tegi_ks kuul kur´a meele?
Kuul iks tegi kurva meele,
katsko tegi kalõ meele.
Mille_ks nu sa rüheq är kooldaq,
mille rühe_ks sa kalmu kalduda?
Maalõ jäi_ks sul latsõq väikeseq,
põrmandollõ jäi_ks põlvõkorrukõsõq,
tarõ- jäi_ks naaq -läve tasakõtsõq,
koa- jäivä_ks naaq -läve korrukõsõq.
Kohe jäi_ks su varik vaesit,
kohe jäie_ks sul kond kurvaliidsi,
kohe jäie_ks sul kamand kah´oliidsi?
Ristipojakõnõ_ks, mu kull´a ristipojakõnõ,
ummi võinu_ks sa ulle hoitaq,
ummi võinu_ks sa kanno kasvatõlla:
kasvatannu_ks sa sugu suurõbast,
kasvatannu_ks sa pisu pikebäst,
kasvatannu_ks sa nu nurmõ kündjäst,
kallis adra-kandjast!
S´oo võit iks sa esiki tiidäq,
umal võit iks sa, ristipojakõnõ, meelel mõtõlda:
lastõ_ks imme, helläkeist,
ristipojanaist, linnukõist -
tuu jäi_ks väega vaenõ,
armas, jäi_ks tä väega armõdu!
Kohe lätt iks tä, vaesõkõnõ,
kohe astus iks, armõdukõnõ?
Kui tulõ_ks täl suur suvõkõnõ,
kenä tulõ_ks täl keväjäkene,
eka olõ-i täl nurmõ kündjät,
kallis, adrakandjat.
Kost võtt iks tä nurmõ kündjä,
kallis, võtt iks tä adrakandja?
Sys iks tä ikk ilma-väega,
kado-väega kahitsõllõs!
Umaq um iks nu latsõq väikeseq,
umaq iks kasinaq kanasõq -
esi lätt iks tä nurmõ kündmä,
kallis, lätt iks tä atra kandma,
neio, nakas iks küüdsil kündmä,
pässil iks nakas pääd ravitsõmma.
S´oo tegi_ks kuri koolukõnõ,
s´oo tegi_ks kalgi kadsokõnõ,
koolu_ks tegi kurva meele,
katsko tegi kalõ meele!
Jummal tiid iks jumalakõnõ,
miä saa_ks timäst vaesõst,
kua saa_ks timäst kurvalitsõst,
saa_ks liiva leinalitsõst,
saa_ks kalmu kah´olitsõst?
Jäi_ks tä varra vaesõst,
inne-aigu ikma.
Ristipojakõnõ_ks, mu kull´a ristipojakõnõ,
ammu olõ-s iks tuu aokõnõ,
kuna_ks mi keeri kerikohe,
kuna_ks mi astõ alõvahe,
sino_ks mi naista naidi,
võti_ks nu linnu linikpää.
Nu jäät iks sa varra vaesõst,
inne-aigu ikma!
Miä olli_ks sul viga elläq,
kua olli_ks sul kaiho kasvuda?
Elläq võinu_ks sa ello ilosahe,
ollaq võinu_ks sa ello uhkõhe,
ummi võinu_ks sa ulle hoitaq,
ummi võinu_ks sa kanno kasvatõlla -
latsi jätnü-s sa ilma ikma,
kulla, jätnü-s sa ilma kuukma!
Kui_ks tulõ turupäiv,
kui_ks laskus laadopäiv,
latsõq läävä_ks ussõ huulitsallõ,
läävä_ks naaq vällä värehtille,
umma läävä_ks naaq esse uutma,
kasvatajat kaema.
Kohegi näe-i_ks naaq esse tulõvat,
kasvatajat kalduvat,
keä_ks näile saia saa,
keä näile_ks kosti tuu!
Keä tuu_ks turust turu-leevä,
keä saa_ks liinast saia-leeväq?
Jäävä_ks naaq valda vaesõlatsõq,
jäi_ks naaq kolka kurvalidsõq,
ilma_ks eseldä kanasõq.
Ristipojakõnõ_ks, mu kull´a ristipojakõnõ!
Jummal tiid iks jumalakõnõ,
esi tiid iks taa armas Eessukõnõ,
miä saa_ks neist vaesist,
kua neist kurvalitsist?
Keä_ks hoit ullikõisi,
kasvatõllõs kanakõisi?
Oh iks mi linnu ristipoja nainõ -
pall´o näge_ks tä kaiho kasvatõh,
silmä- näge_ks tä -vett vinnüteh,
kuna_ks naaq kanaq kasusõq,
virveq üles vinnüseq!
Jummal iks tiid jumalakõnõ,
s´oo olli_ks Eessu iskmine,
s´oo olli_ks Looja luuminõ!
S´oo olnu_ks ku mi tegemine,
os´a_ks-ni olõminõ,
sys veenü_ks mi koolu kohtuhe,
sys veenü_ks mi kadso kantorahe!
Eka olõ-i_ks koolul kohut,
olõ-i_ks kadsol kantorat.
Ristipojakõnõ_ks, mu kull´a ristipojakõnõ,
hallõ um meil iks hauda viiäq,
kallis um meil iks kalmu kattaq!
Sinno_ks mi ikõ ilma-väega,
kado_ks-mi-väega kahidsõ:
mille rühe_ks sa noorõlt är kooldaq,
inne ikä maalõ minnäq?
Esi võinu_ks sa inäbä elläq,
katõvõrra_ks aigu kasvuda!
Jummal tiid iks jumalakõnõ -
edi lasõ-s Eessu sul elläq,
kallis Maarja kasvaq,
Eessu nakas´ iks sinno ihkamma,
kallis Maarja kaema?
Jummal iks tiid jumalakõnõ,
kuis saava_ks su vaesõq hoieduq,
saavaq kanaq kasvatõduq?
Jummal pidä_ks hoolõ vaesist,
Maarja kand iks kõrra kah´olitsist:
vaesõq võtt iks tä hindä valida,
ulliq võtt iks tä hindä huuldõ.
Lastõ_ks imme helläkeist,
lastõ_ks maamat, mar´akõist!
Süä um iks täl süväste haigõ,
meeli um iks täl ladvani lahki:
ilma jäi_ks tä umalta ülält,
kallis, jäi_ks ilma kasalda.
Üllä_ks tä ikk üüse,
kassa_ks tä vaak valgõga,
umma ikk iks tä ello ilosat,
umma ikk iks tä muudo muutsat.
Ärä_ks nu essü illos´ elo,
ärä_ks nu vass´u vallus´ elo.
Ristipojakõnõ_ks, mu kull´a ristipojakõnõ!