13. Hillä, hillä, helläq languq!(Sajarahvast kutsutakse sisse.)

SL 1631.
H, Setu 1884, 42 (10) < Kran´tsova k. - Jak. Hurt < Darja Petrovna (1884).

Hillä_ks, hillä, helläq languq,
tassa, tassa, targaq languq!
Tulgõ_ks ti hillä ese kodo,
tassa ese talolõ -
meil iks väräq väikeseq,
ommaq piidaq peenikeseq,
om iks mi esel maja matal´,
ommaq katusõq kasinaq!
Tulgõ_ks ti majja madaluisi,
tulgõq tassa mi talolõ,
ärä_ks ti tulgu-i torõhõhe,
ärä käugu-i kärehehe -
tunnõ-i mi ese torõhit,
käänä-i päädä kärehille!
Kui tult iks tassa mi talolõ,
hillä hellä eläjälle,
sys saat ti_ks häste hoietus,
pehmehe peetüs.
Kui_ks ti tulõt torõhõhe,
kui ti käänät kärehehe,
suurõ_ks lasõ sys väräq suu puult,
lajaq väräq laanõ puult,
lasõ_ks sys sajal suuhu sõita,
kaasikil laandõ karada!
Hillä_ks, hillä, helläq languq,
tassa, tassa, targaq languq!
Kui ti_ks tulõt ilosahe,
kui ti kaalut kaunihe,
hüä_ks mullõ, hüä muilõ,
illos´ õgalõ ütele -
sys om iks meil illos´ ilotõlla,
om meil vessel´ veerätädä,
sys iks ti sünnüt mi söögele,
sys ti lepüt mi leeväle.
Langu_ks-kõsõq, linnukõsõq,
madalikuq mar´akõsõq,
hot´ iks tulnu tuhannõ võrra,
hot´ iks saanu sa'a võrra,
küll mi_ks majja mahutannuq,
ese tarrõ taatannuq!
Tuud es pelgü pelänü-s,
pelänü-s meile tulla,
kahinu-s kaldunna!
Esel iks hot´ [matal´] majakõnõ,
ommõ kassin kodokõnõ,
süvväs iks meil siih selget,
var´o alla valgõt.
Pelänü-s meile tullaq,
kahinu-s kalduh!