31. Mõrsja au kaitsetakse.

SL 1658.
H III 29, 940 (17) < Setumaa - M. Evert < Juuli Pille (1901).

Kolka_ks nu kur´astõ kõnõli,
veeri veerät´ vihasahe:
ülti_ks peet pihavüü,
kulõhunu_ks kos´avüü.
Kolka_ks nu kur´astõ kõnõli,
veeri veerät´ vihasahe:
mõista-i_ks kabo kangast kutaq,
imelatsi langa heitä,
lasi_ks küläh kangast kutaq,
veereh kangast vitäq,
sis massiva_ks naaq jahumatiq,
sis teivä_ks naaq teräkotiq.
Langukõsõq, linnukõsõq,
mi meelimar´akõsõq,
s´oo_ks kõik kõrralda kõnõldi,
as´anda juttu aeti -
ega_ks tii-s teräkotiq,
ega_ks massa-s jahumatiq,
esi tä_ks tegi neiokõnõ,
esi kudi kullakõnõ!
Olõ-i õigõ, miä ülti,
olõ-i kõrrah, miä kõnõldi:
edo mõist iks meil neio kangast kutaq,
mõist virve kangast vitäq!
Kudi kangast, tarõ kumas´,
heidi langa, tarõ heläs´.
Sedä naaku-i_ks ti pelgü pelgämä
ja murõht murõhtama!
Neio_ks-mi-kõnõ noorõkõnõ,
noorõkõnõ, nõrgakõnõ!
Edo_ks nu meilä noorta neiot,
kasinata imekanna -
kotoh olõs tä võinu ollaq, kullakõnõ,
majah meelimar´akõnõ,
umma olõs võinu kotogi kullõlda,
umma pereht pelädä!
Neiokõnõ noorõkõnõ,
sullõ_ks mi oppa, neiokõnõ,
kuulutami kullakõsõq:
kui saat iks sa sinnä, kullakõnõ,
majja, meelimar´akõnõ,
heidä_ks linik lehmä pääle,
kapudaq kar´a pääle,
lasõ_ks linik lehmä lüpsäq,
kapudaq karja saataq!
S´oo_ks ma kõrralda kõnõli,
as´anda juttu aie -
ega_ks linik lehmä lüpsäq,
kapudaq ei saadaq karja,
esi_ks sa, neio, lehmä lüpsät,
esi_ks, kabo, kar´a saadat.
Kui tulõt iks sa üles hummogulla,
varra inne valgõt,
uutku-i_ks ülesajajat,
kulla üleskutsujat,
tulõ_ks ilma ajamata,
kulla, ilma kutsumata!
Neiokõnõ_ks noorõkõnõ,
hummogul iks lehmä lüpsäq,
lehmä lüpsäq, kari saadaq,
kütä_ks ahi, tiiq süük!
Neio_ks-nu-kõnõ noorõkõnõ,
noorõkõnõ, nõrgakõnõ,
sullõ_ks mi oppa uma läbi,
kaalutõlõ kalli läbi,
neio_ks-nu-kõnõ noorõkõnõ!