32. Peigmeest viiakse õue.

SL 1659.
A: SKS, Veske-Stein nr. 94 b < Selise k. - V. Stein < Orti Kull´o (enne a.1872).
B: ÕES, V. Stein 1, nr. 20 b ja H II 62, 666 (20 b).
A. (Algupärane üleskirjutus):
Velekene noorõkõnõ,
noorõkõnõ, nõrgakõnõ,
läkeq ussõ kaemahe,
neio tsõõrilõ morolõ,
kohe_ks nu viid mi verrev,
kohe_ks murrõt Musto-ruuna!
Ehk om meil iks verrev virdsa pääl,
Musto-ruuna mulla pääl,
halli ruuna haina pääl?
Sinnä meil iks sinidseq tsilgõq,
maalõ mi_ks lätsi maagõlangaq.
Olõ-s vet Musto mulla päälä,
halli ruuna haina pääl,
verevät virdsa pääl -
om iks vet tuu[h] huunõ[h],
koh ommavaq kulladsõq kor´usõq,
pääl iks ommavaq karradsõq katusõq.
Puuraq iks ette puhatuq,
kaaraq ette kahrituq,
suviröäq survuduq -
heidet iks vell´o hiirolõ,
murrõt vell´o Mustolõ,
veerätet vell´o verevälle.
Ait´umma mi velele,
ait´umma armallõ:
hää om rahvas ja hää om ravi,
hää pereh, hää pido,
meid iks häste hoieti,
pehmehe peeti!
B. (Pärastine ümberkirjutus):Vel´okõnõ noorõkõnõ,
noorõkõnõ, nõrgakõnõ,
küüniq sa ussõ kaema'e,
neio tsõõrilõ morolõ,
kohe no veet su verrev,
kohe om murrõt musta ruuna!
Ehk om su verrev virdsa pääl,
ehk om musta mulla pääl,
halli ruuna haina pääl?
Kaeq kas puuraq ette puhatuq,
kaaraq ette kahrituq,
suviröäq survuduq,
heidet ette hiirolõ,
murrõt vel´o verevälle,
veerätet vel´o mustolõ?
Vel´okõnõ noorõkõnõ,
olli_ks höäste hoolta kantu:
höä sis rahvas, höä ravi,
höä pereh ja höä pido,
kõik sis höäste hoietas,
pehme'este üles peetäs!