40. Mõrsjat hakatakse küsima.

SL 1668.
H, Setu 1884, 345 (14) < Vinnüski k. - Jak. Hurt < Tatjana Kondratjeva (1884).

Kuulkõq, kulla langukõsõq,
mõistkõq, meelimar´akõsõq -
ti_ks söödiq, ti joodiq,
meid miilä ravidsiq,
vahaleemel vasta võtiq!
Oo_ks mi veljä noorõkõist,
armast au-latsõkõist!
Vell´o_ks meil väega vihanõ,
imekana kammõldunu.
Angõ_ks neio mi nätäq,
angõq ka(a)bu mi kaiaq,
sys iks agu süük süübüs,
agu juuk juubus!
Meile_ks kõigildõ kõnõldi:
ülti_ks tuu neio pilve piu,
pilve piu, laiva laiu.
S´oo_ks mi kõrralda kõnõli -
olõ-i tuu neio pilve piu,
olõ-i neio laiva laiu,
sääne_ks neio, määne luud,
sääne ka(a)bo, kui kasunu.
Kuulkõ_ks, kulla langukõsõq,
mõistkõq, meelimar´akõsõq:
innembüsi_ks neiot ehitelgeq,
varahampa valmistagõq!
Ega mi siiä ilma tulõ[-s],
aja-s hobõst as´anda:
tuha[t] kõrra_ks toobiq juudiq,
sada kõrda saiaq süüdiq.
Siiä_ks sisas´ silmäq tõi,
orrav tii osaldi,
tulli_ks mi umma otsima,
kapo peräh kaema.

SL 1669.
H, Setu 1884, 147 (37 I) < Kran´tsova k. - Jak. Hurt < Darja Petrovna (1884).

Neio ime helläkene,
neio maama, mar´akõnõ,
teke_ks uma tegemine,
kaegõq uma kaeminõ,
toogõ_ks neio mi nätäq,
toogõq kabo mi kaiaq!
Vell´ol iks söögiq süübü-i,
vell´ol joogiq juubu-i.
Ime_ks lausi meelestäni,
lausi meele poolõstani:
"Kuulõ_ks, väiko väükene,
anni_ks aigu kasvatõlla,
kasvatõlla, kannitsõlla,
anna_ks aigu ehitellä,
kabokõista kabistõlla!"
Sai_ks tuu kabo kabistõtus,
imelatsi ehitetüs,
vell´o läts iks umma ots´ma,
umma kapo kaema.

SL 1670.
H, Setu 1884, 228 (15) < Tobrova k. - Jak. Hurt < Tobrova Ode (1884).

Langukõsõq, linnukõsõq,
vagivahtsõq umadsõq,
angõ_ks neiot mi nätäq,
angõq kabo mi kaiaq!
Meil om vell´o vihanõ,
imekana kammõlik,
kui ei saaq neio neide nätäq,
kabokõnõ neide kaiaq.