56. Kaasikud laulavad lahkudes.

SL 1693.
H, Setu 1884, 352 (18) < Vinnüski k. - Jak. Hurt < Tatjana Kondratjeva (1884).

Mi vell´o loonatark,
kado kundsõni kavval´!
Vell´o meil tekk´ kolmõq keeleq,
kolmõq pand´ tä palmigoq palolõ:
üteq tä tekk´ tedre-keeleq,
tõsõq pand´ pardsi-keeleq,
kolmandaq neio-keeleq.
Tedrest iks saa tii-käuja,
pardsist saa paa-pandja,
neiost man-magahaja!
Mi_ks verrev velenaane,
s´oo_ks mi oppa uma läbi,
noomi noorõ neio tähe:
jätä_ks kodo kolm muudo,
viis usku velisille:
üts iks jätäq ulli usk,
lastõ muud moro pääle,
hapnõpiimä har´otus,
jätäq rõõgõh rõõsal piimäl,
päälse päält-võtminõ!
Kuulkõq, kulla langukõsõq,
teke_ks meele minekit!
Minnä tahtvaq mi hobõsõq,
tinaratsuq telderitseq.

SL 1694.
EKS 8º 4, 264 (46) < Räpinä khlk. - J. Jagomann (1877).

Mille_ks ikiq külänaaseq,
lasiq vett viirmätseq?
Ülti sa kuri küläle,
kalg´ külä kar´usillõ.
Neiokõnõ noorõkõnõ,
jätäq sa kodo kolmi muudo,
velitsihe viis muudo:
üts iks suur suikminõ,
tõnõ lag´a lamõminõ,
kolmas iks vastakostõminõ;
üts jätäq võiu võttõminõ,
kohopiimä korjaminõ,
hapupiimä har´otaminõ!
Neiokõnõ noorõkõnõ,
ärä sa_ks rikkuq riidit,
ajagu-i kotti kolmapäivä!
Kaldut sa_ks karja saatõmahe,
veerüt vitsa võttõmahe,
ärä sa_ks murrit Must´o sarvõ,
lahki leiet Laagi sarvõ,
labaluu leit lambal,
käänit kärsä põrssal.
Neiokõnõ noorõkõnõ,
jätä_ks kodo koti-sõrmõq,
tii pääle teki-sõrmõq,
meele tuuq mereste-sõrmõq!
Meil iks veli hoolõlinõ,
hoolõlinõ, meeleline:
tegi_ks mõrra mõttõliku,
tegi sääsä säädeliku.
Koh iks lombiq, sääl ommaq lutsuq,
koh ommaq havvaq, sääl ommaq havvõq -
höä_ks kalal kudõda,
lutsul luid liigutõlla.
Toorõs sul iks kala tulõla,
elokala katlah.
Velekene noorõkõnõ,
kullus sul iks väits kullanõ,
hõõrus iks pää hõpõhõnõ -
haug iks helle, latik lahhe!