58. Teke_ks teele minekit!(Kaasikud laulavad.)

SL 1696.
H, Setu 1884, 79 (16 I) < Kran´tsova k. - Jak. Hurt < Darja Petrovna (1884).

Velekene noorõkõnõ,
imelatsi helläkene,
teke_ks teele minekit -
kotoh meil iks oodi uma ime,
kaie katsi vanõmbat!
Lasi_ks naaq käo käugi pääle,
pühä poja püvvü pääle -
kodo_ks naaq oodiq tulõvat,
kaieq kodo kaaluvat.
Ime_ks om kotoh kurvalinõ,
meelest meelepahalinõ:
mille_ks naaq kavva neio kotoh,
kavva mõrsja mõisah?
Agu_ks aeti sõimõlõma,
sõimõlõma, lõimõlõma,
agu_ks meil võtt´ vell´o vihameele,
haari haigõ süäme?
Teno_ks olguq jumalallõ,
au maalõ Marijallõ:
ega_ks mi veljä sõimata-s,
laidõta-s imelast!
Kõik olli_ks hüäste hüä hõim,
olliq tassa targaq hõimuq.
Täüsi oll´ meil süvväq, täüsi juvvaq,
tävve_ks meil kanniq kannõtigi,
tävveq toobiq tuudigi,
meidä_ks miilä raviti,
vahaleemel vasta võeti.
Ait´uma velele,
ait´uma mi armallõ,
kiä ots´ neio ollõ-paigast,
viina-paigast veerätelli!
Üli- olli_ks meil siih -hüä olõminõ,
armas aoviitmine.
Neio_ks sa ime helläkene,
neio maama, mar´akõnõ,
tii_ks sa uma tegemine,
kaeq uma kaemine,
lasõ_ks sa meidä minemä!
Kotoh iks meil oodi vell´o ime,
vell´o ime, vell´o ese,
katsi_ks kallist vanõmbat.
Laskõ_ks meidä minemä,
minnä_ks tahtsõq mi hobõsõq,
teedä sõitaq telderikuq!
Neio_ks ime, neio ese,
unõhtu_ks oppamada,
jäi jävildämäldä:
kui_ks ti hummõn meile tulõt,
kui ti veerät vele kodo,
ärä ti kuvva_ks kodo jätku-i,
maalõ meelimar´akõisi!
Tulgõ_ks vanaq, tulgõq noorõq,
tulgõq kinäq keskimätseq,
tulgõ_ks meheq, võtkõq naaseq,
tulgõq naaseq, võtkõq latsõq!
Peläku-i_ks meele tullaq,
kahiku-i kalduh:
kuus jäi_ks meil hällü kudajat,
katsi kablategijät,
viisi_ks vahru valmistajat -
külep iks saavaq ti ulliq hoietus,
kasinaq kaetus!
Küll saava_ks katõl käel kannõtus,
viiel sõrmõl viidüs,
Peel´o_ks mi piimäl purõtõllõ,
Maas´o piimäl maatõllõ.
Peläku-i_ks meele tullõh,
kahiku-i kalduh -
olõ-i meil pido peenikene,
vaenõ vastavõtõminõ!
Ese käsk´ iks kutsuq ni kumardaq,
käsi_ks pallõldaq, painutaq:
tulgõ_ks ti kõik neio hõim,
kaalkõq kabo umadsõq!