Karl Martin Sinijärv
Sa himoline lauluingli
kiä sa tandsit mino halu
hallõpalavide hüci süämeh
luut naanõmehelidsil
üttesukuarmastajil laulõ
ku meil mitmõsugulidsiga
um vahet vaks
su kistumisel
äripäävähelütümäl sünnüs
tuldhaardvast himopraasnikust
tulitüül ilolidsel
su perämäne puusli
homo sexualis
Marele
-Vanaimä vanaimä
annaq mullõ
annaq mullõ
annaq ehtit mullõ
annaq sõlg´
ni kaalarahaq
annaq baabakõnõ baaba-
-Olõt väikukõnõ
cill´o tütrekene
Rahaq kabõhõisil
Sõlõq mehenaisil
Sullõ cill´okõnõ ketikene
viis´ talvõ vanas sait
um aig
hoiaq häste sjoo um
kygõ edimäne
sjoo kygõ perämädses
ückõrd jääss-
-Vanaimä vanaimä
Naabri Nastal kaalahn
joba rahaq
a mul a mul
ücainukõnõ ketikene
peenükene-
-Ei viil ei viil
sa kasuq
kaal rassõs saa
ku eloginaq
kõrraga
Hää külh
saat ketikese mynõ viil
sait kümme talvõ täüs
opiq lauluq kuaq vüüq
korja sõrmussit
ku pruuti tuvvas
habiq virka
õkva ku tä näid
üleola hiitnü
piät ynnõ habima
ni hoitma piät habima
viil inämp hoitma-
-Tahn lac´kõnõ sullõ
rahakõisi kelläkeisi
et hällühn helähtäsiq
kõlisasiq kul´atõdõhn
rahakõsõq rahakõsõq
kergemb saa mul
võttõhn kaalast
saa rasõhõmb
ku võtat kaala
hoiaq kaala
sirgõlt pistü pää
oh lac´kõnõ mu lac´kõnõ-
-A sõlgõ ma ta' sõlgõ-
-Ei muq käest saaq
ku tulõ viijä
kül tu tuu-
-Vanaimä vanaimä
ma lää kumardama
mu kucuti
piät sõlõga
piät sõlõga-
-Saat imä uma lainus
sa kaeq
sjoo katõ pääga cirk
su kaic
sjoo terräv nõgyl´
hammõlahkõ hoit
sõrmõ cusaku-i
ku kumardat
sis hoiaq käega
sõlg´ rassõ um
piät sälä kõva hoitma
lac´ har´odaq
või-ollaq pia
jäät sõlõkandjas
või-ollaq pia
saat eloandjas-
Ni kos´aq käünüq
saajaq saanuq
olt uibust ynnõ võtnu
tamm´ tanno päähä säädmähn
Ni mehest hoiõt
edimäne üü
Um kumardõduq veimi jaet
mõrsjaküpär päähn
Ei andaq sõlgõ viil
kas sis ei andaqki
mu viijä tõi
ma timä sai
iks vallalõ mu hamõq
kavvas viil
A ristiimäkene
linacõhe linikuhe
hõpõkraami mähk
tä korjas sõlõ
sisse ketiq
helmekõrraq
rahacõq
Tä kaess kas saiõ
kyik et midägi
ei jäässi maaha
Piät maaha jäämä
suguvõsa kaicõvaimuq
Ni pruuti kaicma
mehe umaq ainult
Ait külmä hyyhkas
Ristiimä naaruline um ni vaiki
sõlgõ uma sõlõ pääl hoit
ni ütte tõsõga viil kargas
meheimä valgõs mõstu kässiga
mu hammõlahet
läbi jämme nõgla krukk´
hõpõt sõlõ pääle satas
niguq kilksnä
viil ni viil
nüüd tiiä parõmbahe
viil ku peräst üüd
et naasõs saanuq
õkva nüüd
jah nüüd
Mu rüpühn rüükjä
rynna paistõ nucutaja
mu lahki lahkja
mino edimäne tütär
Sa sündüt
ni sino vanaimä
mino imä rynnast
valgõ palajide sisse
vöie linte vaihõlõ
jäi praasnikides
sõlg
Mu hindä sõlgõ
iist sääl võetas
et läbi mulgu vallõhn
pühäs saanuq vesi
mõsõs lacõq
joodas loomaq
Oh tütrekene
varra küünütät viil kätt
ei inne ku olt
viie talvõ vannu
sataq sino kaala
vanaimä kaalast kett.
Vaivalt kanda saanuq
um üles kasvatõduq lacõq
tütrel tütär üsähn
mu vaiv um kannõt
mu kihä andnu eloq
Sõlõpõlv´ um naanu
kühmä vaotama mu sälgä
kas mu uhkus suhvlihe
piät jäämä
mu uhkust lacõq
edesi piät kandma
Olõ-i põllõlda ma põrmandullõ
ei tanolda tiist üle lännüq
ei kerkohn käünüq sinoga
mu hõpõvalgõ sõlg´
Mu helmekõrraq helisemähn
lacõlaci kaalahn
Mu sõlgõ edimädse puja naanõ
uhkõlt kand
um elo eletü
ma käeq sää risti
rätinukkõ alt las nätäq jääss
mu edimäne ketikene
mis mino vanaimä
mullõ pälmise pääl and´
Päiv aknõst sisse paistu
Hussimaarjapäävä paiku
tä valgõl mino ketikene
edimäst kõrd läügäht´
Üc elo lõppõmaldaq ketikene
miä kyiki naisi
kaalu ümbre hindä käänd
lätt hauda ütehn
a elocõõris paistma
ücainus eheq
sõlg´
meil jääss
Täämbä saiõ mina teedäq
kohes matõt uma imä
Sinnäq liiva kundi sisse
kahisavvi puiõ man
Tulli taaha uibu alaq
nigu uma imä manoq
Uibust satas häiermit
mino silmist pisarit
Kasuimä minno pess
viis´kõrd päävähn vica and
Näie kuukõist korgõhn korgõhn
naksi tedä pallõma
-Kuukõnõ kuukõnõ
võtaq minno hinele
Päivä tüütäs söömäldägiq
ilda laulas joomalda
Kuukõnõ kuukõnõ
võtaq minno hinele-
Nii ma isti uibu alaq
umma ello ikkõma
Uibust sattõ häiermit
mino silmist pisarit
Kuukõnõ mino võti
kygõ viipaarõga
Sääl tä mino taiva nõsti
viipangiq veeretasa
Cilka vett tä maaha-s ajaq
kannipuid es unõhta
Noq ma korgõhn vett kanna
inämb vica ma ei saaq
Olõ-i uibut olõ-i ikku
pisarit ei häiermit