Perenaene käinu endä latsil hoitjat otsiman. Tullu üits tütrik tii pääl vasta. Perenaene kaubelnu tütriku endäle latsehoitjas. Tütrik lubanu kah tulla.
Perenaene küsinu:
"Messä minu latsele laulat kah?"
Tütrik ütelnu:
"Mina laula:
Tsu, latse, surma poole,
kiigu, latse kerku poole!
Jala een, pää perän,
käe risti rindu pääle,
pää valge päiva poole,
jala musta mulla poole."
Perenaene ei ole toda tütrikku endäle latsehoitjas võtnu, tema nakanu tõist tütrikku endäle otsma.
Saanu tõseka kokku. Perenaene küsinu:
"Tule mulle latsehoitjas."
Tütrik lubanu kah tulla.
Perenaene küsinu:
"Mes sä minu latsele laulat kah?"
Tütrik ütelnu:
"Mina laula:
Tsu, latse, suurembas,
kasva, latse, karjusses,
mesipuu puhastajas,
tarulavva lakkujas!"
Perenaene ütelnu:
"Ja, sellega ma ole rahu väega," ja sai too tütrik latsehoitjas.
Nüüd tulli tütrigul hää põli. Saanu iluste süvva ja muidu iluste üles peetus. Perenaene ei ole mitu päävä lännu ämp latsi kaema. Küsinu vahel üle läve:
"Mes latse tegevä kah?"
Tütrik ütelnu:
"Latse omma iluste."
Perenaene lännu tagasi. Tõse päevä küsinu jälle:
"Mes latse tegevä kah?"
Tütrik ütelnu perenaesele vasta:
"Latse makase kui mardiku.
Kõtu täis kui kõdriku*1."
Perenaene lännu jälle rõõmsa meelega tagasi. Nii lännu mitu päivä müüdä.
Sis lännu perenaene latsi kaema, et kuis nema iks väega rahuliku ja iluste omma. Latse ollu ärä koolu*2 põrmandu pääl pikäli maan nigu prussaku. Tütrik muku määrnu mett latsile mokke vahele. Olluva kõik viimätse*3 ärä koolu.
*1 kaun; *2 surnud; *3 viimseni
19. Lapsehoidja otsimine.H III 28, 653/5 (3) Otepää, Palupera v. – Joosep Silde < Mai Pootsmann (1896). – AT 37 (+15) – 15 t. Läänepoolsete rahvaste juttudes otsitakse lapsehoidjat, idas ortodokside alal itkejat (nutunaist).