Карсемат
Икеле эрзятне-мокшотне иень перть яксесть карьсэ - карьть, карьхть. Ломаненть эрямосонзо картне ульнесть пек эрявикст, секс раськенть койтнесэ сынст кирдильть мельсэ. Ёвтнить, кода седикеле эйкакшонь чачомсто кудоконянтень каильть карть казнекс Карь-пазонтень (Клебанд 1986: 58).



Карть. Башкирия, Фёдоровкань район, Фёдоровка веле. Сарв Х. 1983. (Fk 2028 : 75)

Эрзятнень-мокшотнень карест кодазельть а истя, кода лиятнень. Каренть прязо кодазель диагональсэ - истя кодамсто карь прянть перька теевсть мендявкст атёкшкат. Картнень карсилизь карькссэ, конат поназельть лияназонь сурестэ. Покш чистэ путыльть понасурень карькст, эрзятнень сынь ульнесть якстереть (Клебанд 1986: 58).
Сисем ленгесэ кодазь картненень мерсть семилычка.

Покш чистэ яксесть, мокшотне седе ламо, кемсэ - кемть, кямот. Кемтнень верьксэст мазылгавтызе орнамент, кементь куншкавидезэ сормазель, секс кемтненень мерсть кармошка-кемть.
Алкине кемтнень лемест ульнесть ботинкат, полсапожкат.

Эрсисть шнурка марто котат, сапакат, конань ускилизь ошсто, ансяк эрзятнень, мокшотнень ютксо котакс лововильть весе алкине кемтне, кодамо формаст а улевель. Котат мерсть резинань ботатнененьгак, конань кандтлесть XX пингень ушодовкссто седе сюпавтне (Белицер 1973: 173).

Телень шкане эрзятне, мокшотне яксисть понань кемсэ, конанень мерильть тёплы кемть.

Карень карсемстэ терявтсть седе парсте тапардамс пильгтнень перька коцтонь панкстнэнь. Веенстнэ, пракстатне, теезельть седе кеме коцтсто, эйсэст тапардылизь пильге лапанть; омбонстнэ, пелькстнэ, теезельть седе човине коцтсто, эйсэст тапардылизь пильгенть кумажа видьс. Эрзянь кельсэ сынест мерильть пильге петь.


Покш чистэ мокшонь аватне пильге серькаваст тапардыльть понань коцтонь якстере панкст серьгат (Белицер 1973: 175).
Парсте тапардазь, эчке пильгтнень мазычидест эрзятне кортыть паро мельсэ. Одирьвань саема моротнесэ одирьванть мазычинзэ шнылизь парсте карсезь пильгензэ кувалт. "Ашо килейть" мерить Саратов губерниянь эрзятне ашо пракстасо карсезь пильгетнеде (Маннинен 1929: 140).

Седе тов аватне кармасть кандтлеме цюлкат. Цюлканть верьце пентень мерильть цюлка мазынят.



Кармошка-кем кемо, мазылгавкс кементь верьце песэнзэ кемопиткс, понань сурестэ кодазь кумажава цюлка кемотюлка, панар алкс. Мордовия, Ковылкинань район, Мокшонь Авгур веле. Карм Ю. 1985. (Fk 2131:38)


Кем марто мокшонь аватне кандтлильть кемотюлкат, конат вельтизь кумажатнень. Пильгтнень мазылгавтылизь кяме петькс эйсэ, сынст нолдылизь кем верьксэнть ланга. Кем петне панар алксонть марто ульнесть малава вейкеть, эйзэст стазельть лентат, повт, галунт, кружала панкст, плёскань кикст (Клебанд 1986: 57).