Мазылгавтомапелькст
Кумаценть эйстэ стыльть цёрань панарт, авань икельга пацят. Ланга оршамонть, руцянть, эйсэяк улить кумаць эйстэ стазь таркат. Ситцасто стыльть икельга пацят, пряспацят. Нанканть, байконть эйстэ, моротнень коряс, стазельть ланга оршамотне, конань кандтлизь цёратне, кисеенть эйстэ стакшнозельть одирьвань фататне (Белицер 1973: 28).
 Эрзянь ава штердемстэ ушосо. Башкирия, Аургазинэнь район, Макар веле. Сарв Х. 1983. (Fk 2028: 103) |
Панартнэ теизельть эсь кедьсэ кодазь лияназ, кручонка, холст коцтсто. Пона сурень коцтонтень мерильть понань коцт, лияназ сурень коцтонтень - кода эрзятне, истя мокшотне - мерсть кесак. Ставкс эскелькстнэнень мерсть рузокс крестик.
Икеле пеле лецтязельть валтнэ кофта (вант Ланга оршамот), рукават (вант Панарт) - лиясто неке лемтнесэ мерильть панаронть верьце пельксэнтень.
1950-це иетнестэ кармасть стакшномо панар петненень лентань кикст - петькст, суташт, тесьмат, фабрикасо кодазь а питней кружеват. Кружеватне эрсисть сырнень, сиянь тюссояк (Белицер 1973: 55).
 Сёрмав петькс панар алганть, кем верьксэнь мазылгавкст кемопиткс. Мордовия, Ковылкинань район, Ташто (Сыре) Пшенёв веле. Карм Ю. 1985. (Fk 2131: 109) |
Петькстнэнь, конань лангс теезельть сёрминеть, стакшнылизь панар петнень ланга снярс панарось кандтлевиль. Мейле секе петькстнэнь стылизь лия панарс.
Вигинесэ кодазь панар алксонтень мерсть крутка.
Панартнэнь лиясто мазылгавтылизь варинесэ - варинят.
Мокшонь аватне стыльть панар алксонтень, ожатненень раужо поназь тесьма кив, конань сынь теилизь сынсь (Белицер 1973: 53), эрзянь аватнеяк мазылгавтылизь панар алксонть, ожатнень, меште варянть эсь кедьсэ теезь тесьмасо - сюк, лиясто пона сурень тесьмасо, конань сынь кодылизь лазнэсэ (Белицер 1973:42).
Кода сёрмадсь Маннинен, эрзянь аватне пек паро мельсэ аштесть пулаест - пулакш, пулагай, кувалт. Пулаесь теезель кавто пельксстэ. Верцесь ульнесь викшнезь якстере суресэ, мазылгавтозь плёскасо, ярмаксо, повсо, эрьгесэ, ёлдоравкссо (ракушкасо). Алце певанть ульнесть пулосуреть. Икеле шкань пулайтнень эйсэ васняяк неявсь верьце пельксэсь, седе тов те таркась тееньгадсь, эйстэнзэ кадовсь ансяк каркс - суретнень кувалмост яла покшолгадсь (Маннинен 1929: 135). Стяко чистэ кандтлесть удалга паця, конань верьце пельксэсь викшнезель якстере, раужо пона суресэ, чавозь плёскасо - плёстка, алце пентень поводезельть нарядт.
 Удалга паця пулагай, верьце пельксэсь. Самарань губерния. (В 3: 4) |  Удалга паця пулагай, куншка видьсэ - наряд, алце песэнть понасуреть - суре. Самарань губерния. (В 3: 4) |
Плаштянь, човалянь кикстнэнень мерильть наряд. Удалга пацянь карксонтень поводезельть раужо, якстере, пиже суреть - суре.
 Удалга паця пулагай, мазылгавтозь човалясо, понасурень цёкосо - цёка. Самарань губерния. (В 3:4) |
Пулокарксонть эйсэ суретнень кувалмост ульнесь 20-40 см, аванть сэрензэ коряс. Пулосуренть пезэ токадиль кумажас. Пулокарксонть кавто пельга поводезельть цёкот - сёко, човалят (Белицер 1973: 97).
Пулакш карксонтень лиясто теезельть цецянь кондямо розеткат мазый лентасто, понань сурестэ, конань куншкас стыльть плаштят. Розеткатнень лемест ульнесь цветок (Белицер 1973: 98). Истямо мазылгавкст аватне путнесть прявасткак. Мокшокс сынест мерильть панчфкя.
Каркстнэнь мазылгавтылизь понасурестэ теезь повсо, конанень мерсть пангинеть.
 Салмукссо кодазь эрзянь булавка каркс, эйсэнзэ пона сурень повт - пангинеть. (В 61: 6) |
Ламо мазылгавкспельть кандтлесть прявельтявкстнэнь ланга. Косинкантень стыльть цильдердыця горниповт, икелькс ёнганть - сормазь лента - зборявкс, петнева понгавтыльть кувака лентат - ведьме, пуло, алов стыльть парсей панкс - парци. Мокшонь аватнень ульнесь прявельтявксост ока-лента (сырнень лента), конань одирьвась путылизе пряс фата марто.
Маннинен сёрмадсь - эрзянь оршамотнесэ мазылгавтомапельтне седе ламольть мокшонь оршамотнень коряс. Сонензэ марявсь, мокшонь оршамотнесэ арасель сняро фантазия, кода эрзянь оршамопельтнесэ вейсэ саезь: кувакасто кандтлезь панартнэ пек викшнезельть, карксамганть оршазель мазый удалга паця, прявельтявкстнэнь ланга ульнесть ламо викшневкст, ёролдомат (Маннинен 1929: 138).