Прявельтявкст
Мирденень лисезь аватнень черест кодазель кавто черьпулос, чертне кекшезельть прявельтявксонть алов. Кода сёрмадыть седе икелень автортнэ, эрзя-мокшонь аватне, васняяк тейтертне, тейнесть прязост ламо черьпулот. Одирьватнень, кода сёрмадсь Майнов, ульнесь комсь ветешка черьпуло, конань пес содозельть понань суреть эрьва кодамо масылгавкс марто (Маннинен 1929: 135). Мокшонь аватнень прявельтявксонть ало кавто черьпулос кодазь чертне менчезельть пилеюртнэнь видьсэ. Эрзянь аватне пурнылизь черест коня таркантень вейке черьпулос, сень лангс озавтсть сюронь кондямо панго (Клебанд 1986: 45). Пилеюртнэнь видьс менчезь черьпулотненень мерсть сюрот, кавонеск вейсэ саезь черьпулотненень - прясюро.
Эрзянь панго икеле ёндо (B 1: 1; MF e 2856) |
Эрзянь панго удало ёндо (B 1: 1; MF e 2856) |
Эрзянь аватне кандтлесть прясост панго. Панготне теезельть а вейкетьстэ. Ульнесть сюронь кондямо пангот - пшти, мендязь верьце пе марто, коймень кондят, конань верьце песь седе теенель. Панготнень сэрест ульнесь сатышка, удалгаст ульнесь нурькине пуло, викшневкс марто, мазылгавтозь плёскасо (Клебанд 1986: 45).
Эрзяватнень ульнесь лия прявельтявксосткак - сорока, лапужа оршавкс келей пуло марто, кона нолдазель лавтов ланга. Сорокатне теезельть а вейкетьстэ - конат седе алкинеть, лапужат, конат куншка видьстэ седе таргазь верев. Кода прявелькс пелесь, истя пулось викшнезельть якстере пона суресэ, ланга чавозельть човалясо, плёскасо, мазылгавтозь пижень рисьмесэ, сиясо, эрьгесэ (Маннинен 1929: 134). Сорокатнень теемаст пек стакаль, сынст теильть паро стыцят.
Эрзянь сорока икеле ёндо. (B 3: 1; MF e 2908) |
Эрзянь сорока удало ёндо. (B 3: 1; MF e 2908) |
Рав чиресэ эриця эрзяватне васенцеде путылизь прязост сороканть мирденень лисемстэ, седе мейле сорокась эрявсь пряс путомс эрьва чистэ (Клебанд 1986: 46).
Тенде башка, эрзянь аватне кандлесть ситцасто стазь чехлик. Седе тов чехликенть кармасть кандтлеме паця ало.
Чехликенть кондямо прявельтявкс, олосник аватне путыльть сороканть алов.
Се таркатнева, косо седе сыре аватне кандтлесть сорокат, пангот, - тейтертне, одирьватне путыльть прязост златной, сорокань кондямо прявельтявкс (Белицер 1973: 162).
Пацянь кондямо косинканть эрьва авась стылизе сонсь. Косинкатне ульнесть ашот, якстереть-якстере косинкасо якильть 35-40 иесэ аватне, седе тов сынь сюлмсисть прязост ашо косинка (Белицер 1973: 157).
 Мокшокс пацянь сюлмамо: Хено Сарв сюлми паця Ваганова Нинань пряс, невтицякс Беспалова Елена. Мордовия, Ковылкинань район, Сыре Пшенёвань веле. Карм Ю. 1985. (Fk 2131:192) |  Мокшокс пацянь сюлмамо: Мордовия, Ковылкинань район, Сыре Пшенёвань веле. Карм Ю. 1985. (Fk 2131:195) |
Эрзя-мокшонь аватнень ульнесть эрьва кодамо пацят - коцтонь паця, понань паця, губовой паця, руця (мокшонь), шаль. XX пингенть ушодовкссо ламот кармасть кандтлеме шолконь пацят - покш, мазый, парсеень пацят пулосуре марто, конань тюсост пештизь сэнь, якстере, тюжа цецят (Белицер 1973: 157-159).
Од тейтертне сюлмсисть прязост прясуреть, конатне ульнесть а вейкеть эрзятнень-мокшотнень ютксо. Мокшонь велетнева тейтертне кандтлесть ашкоркст, 40-45 см кувалмосо, 5-6 см келесэ прясуреть, конат ульнесть мазылгавтозь ярмаксо, плёскасо, конёвонь цецясо.
Мокшонь тейтерь прясуресэ. Мордовия, Зубова Полянань район, Мокшонь Пимбур веле. Карм Ю. 1984. (Fk 2086:213)
Эстон Раськень Музеень каталогсо ули прясуре, конань лемезэ канева паця.
Прясурентень лиякс мерсть конявкс - сон ульнесь парсеень паця, ламо тюссо, кувалмозо 150-175 см, келезэ 90 см (Белицер 1973: 145).
Ламо тейтертне кандтлесть мазый парсеень шальть(пацят) прясуре марто, конань сюлмсилизь эрьва велесэ эсест коряс.