Икельга пацят

Икельга пацянть аватне кандтлесть аволь ансяк стяко чистэ, сынь путылизь сонзэ покш чистэяк. Икельга пацятне стазельть а вейкетьстэ - веенстнэ ульнесть ансяк карксамо марто, омбонцтнэнь ульнесь мештенть таркасо панкс, лиятне стазельть ожа марто.
Икеле кандтлесть икельга пацят, кона стазельть эсь кедьсэ кодазь лияназонь коцтсто, сынст седе ламо кандтлизь эрзятне. Карксось седе икеле кодазель понань сурестэ. Викшневкс кикстнэ таргазельть верьде алов.



Эрзянь оршамопельть: прявельтявкс панго, пулагай, икельга паця, каркс кушак. Вишка Марезьвеле, Пензань губерня, Саранонь волость (неень шкане Мордовия, Чаунзань район). Пурныцяст П. Сави 1913 иестэ.


Мордовиянь Кочкуронь районсо икельга пацянть таркас мерить удала паця, мезесь чарькодеви лиясто: удало пацясь кандтлема удало, пулай ладсо.



Эрзякс оршазь ава: икельга паця меште ланго марто.
Куйбышевань область, Клявлинань район, Ташто Пиче веле. Сарв Х. 1983.


Меште ланго марто икельга пацятнень седе ламо кандтлесть эрзятне, мокшонь аватнень сынь ульнесть чуросто. Тосо, косо сынст кандтлесть, мерильть тенст фартук. Седе чуросто мерсть сынест запон (Белицер 1973: 71).

Ламонь ульнесть ожа марто икельга пацят - запонт, запунт. Запонось вельтилизе лавтов ловажа-пакаренть, мештенть таркасо ульнесь оршамо варя чочавкс марто, ожатнень алксост сормсезельть ожапес (Клебанд 1986: 50).


Мокшокс оршазь Екатерина, Татьяна, Анна Кирдзапкинат: ожа марто запон, прясо ашкотф, покш кирьгакс бояравань кргане. Мордовия, Ковылкинань район, Мокшонь Авгур веле. Карм Ю. 1985. (Fk 2131 : 35)


Икельга пацятне стазельть лияназонь, ситцань, парсеень коцтсто. Одтнэ стыльть икельга пацяст седе мазый коцтсто, сыретне - топода коцтсто.

Запонтнэ марто велув аштить рукаватне, конатнесэ ожатне стазельть аволь секе тюсонь коцтонть эйстэ, кона саезель лия пелькстнэнь стамс.

ХIХ пингень пестэ, ХХ пингень ушодовкссто саезь эрзянь-мокшонь оршамотнень вакссо кармасть улеме рузонь оршамопельть. Мокшокс сынест мерсть - рузонь щамтне.



Макар велень эрзятнень оршамопелест: сарафан, икельга паця, сарафанонть ало ковта. Теезь 1917 иеде икеле. Башкирия, Аургазинэнь район, Макар веле. Сарв Х. 1983. (Fk 2028: 107)


Авань оршамопельть, конань кандтлильть ХIХ-ХХ пингетнень юткова шкастонть. Мордовия, Ицялонь район, Ламбаське веле. Карм Ю. 1986. (Fk 2177: 72)


Оршамопельтнень эйстэ, конань кармасть кандтлеме эрзятне-мокшотне, васенцекс ульнесть сарафантнэ, платиятне, юбкатне, понькатне.