Ритуалонь оршамот
Ансяк чачтозь эйдень туртов седикеле руцят эзть анокста - перьканзо тапардыльть ташто оршамопельстэ керязь панкст - тетькеметь. Лиясто эйденть тапардамс керилизь цёрань понкс петнень. Кандтлезь коцтось седе чевтель руцякс.
Эйкакшонть лангс васенцеде оршильть панарнэ лемдямодо мейле.
Лиясто эйденть эйстэ мерильть "чачсь чамакс марто". Те чамаксонть седикеле костилизь, путылизь коцтонь кескавнес, конань эйкакшось кандтлизе киргасонзо крёстонть марто вейсэ. Снярдо эйкакшось касыль, те парочинь алстыця чамаксонть од цёрась кандтлизе стазь панаронзо потсо, тейтересь кекшилизе сонзэ кикирьканзо потс. Кикирька мерсть коцтонь панксонтень, конань тейтересь путылизе прявельтявкс алга.
Одирьвань оршамопельть
Мирденень лисема чистэнть одирьванть пряс путозель фата, конань ланга сюлмазель лента, удало паця. Сынст таркас, седе тов, одирьванть пряс путыльть лия прявельтявкс, удало пря, сень авась кандтлизе кото ковонь перть.
Фатась эрявиль васняяк тейтеренть чиямодо мейле. Сонзэ каилизь тейтеренть, чиянь патянть, прява - уголонзо савильть икелев, удалов, кавто пельга, тейтеренть чамазо вельтявиль. Фататнень рамсисть ошсто - базарсто, лавкасто. Сеедьстэ сонзэ казилизе тейтерентень лелязо, лиясто тетязо (Белицер 1973: 146).
 |
Икеле одирьватнень лангсо ульнесть ашо ковта, платия, неень шкане сынь сеедьстэ оршить лангозост, кода весе одирьватне, платия вуаль марто. Кудаванть прясо цецяв раужо паця, пилесэнзэ пилекст пиле прят (ашо суликань эрьгеть, ютксост повт). Кудаванть пильгесэнзэ кемть, конатнень верьга нолдазь мазылгавкст - цюлка верьгакст.
Одирьванть, кудаванть лавтовгаст каязь кувака нардамот - киргапацят (шарфт). Куданть истямо нардамо сюлмазь карксамганзо. Киргапацятнень эрявсь ёрамс нилешка мирденень туема шкантень (казнекс, понговтомс пазава таркантень).
Куломачинь оршамот
Снярдо ломаненть карми лисеме оймезэ, пазаватнень икелев путыть ведь; пазаватнень малас, вальма ваксс понгавтыть нардамо - киргапаця - ломаненть оймезэ, арсеви, ливти ведентень, сень мельга - нардамонтень (Миккор 1994: 158).
Канстень коцтонтень (холст), конань лангсо кулы ломанесь, мерильть рузокс одра, эрзянь-мокшонь кельтнесэ лемезэ ульнесь лангавелькс. Эрьва ломанесь сыречинь самокс анокстыль куломань одежат.
Седикеле кулыцянть лангс путыльть эрзянь-мокшонь оршамопельть (удалга паця эзть путне).
Сурвелесэ кулозь аванть черензэ кодылизь черьбулос, конань пувордылизь коняпрясо истя, кода кандтлесть мирденень лисезь аватне, лангозонзо путыльть кохолка, сень лангс - косинка. Поводь велесэ кулозь аванть черьбулонзо сюлмилизь прянть перька, пряс путыльть колбак, сень лангс ашо колмо уголсо паця (Миккор 1994: 163).
Кулозенть лангс лиясто каильть одрасаван, конань эйзэ сон вельтявиль прясто пильгс.
Васенце ломанентень, кона вастовиль калмицятнень каршо калмолангов кандомсто, казнильть ашо, апак викшне нардамо.