Руцят

Эрзянь руця (B 2: 20; MF e 3682)
Лияназонь коцтсто стазь ланга оршамось - руцясь - пек умонь. Мокшотне мерить руцянтень мушкас. Сон стазь туника ладсо, икеле пельде панжадо, апак чоча. Аватне оршилизь руцянть покш чистэ, ломань юткс молемстэ: церьковав, одирьвань саема таркав. Седе сыре аватне якасть руцясо калмо лангов, кулозь ломатнень лемест кундамо. Од тейтертне оршилизь руцянть одирьвань саема таркав, тенде башка - од ломанень калмамо, снярдо кулыцясь ульнесь пек од, 20 иензэ эзть топодть (Белицер 1973: 82).

Эрзянь руцясонть ульнесть ламо тюжа-якстере викшнекст, конат теезельть понасуресэ. Руцянть кандлесть апак чоча, алдонзо неявсь панар мештенть викшневксэзэ. Эрьва чинь руцянть викшневксэнзэ аламольть. Мокшонь аватне мазылгавтылизь руцяст якстере коцт эйстэ стазь панкссо; кувака кикстнэ алксонть эзга стазельть човор атласонь, кружевань лента марто (Клебанд 1986: 42).

Сень коряс, сняро кикст таргазельть руцянть удалце пельганть, сонензэ мерсть: руця, кавто таргавкс марто; нилева таргазь руця, ниле таргавкс марто, эрва ёнга кавто кикст; котова таргазь руця, эрва ёнга колмо кикс марто. Ульнесть лия лемтькак: гумчань нилева таргазь, кручонкань шлея таргазь руця. Руцянть, конань оршилизь покш чистэ, ульнесть седе ламо таргавксонзо.