Панарт
Эрзя-мокшонь аватнень оршамотнесэ васенце таркасо ашти панарось - сонзэ кандтлильть кода кудосо, истя ломань юткс лисемстэ. Секс аванть панаронзо теезельть а вейкетьстэ: седе пек мазылгавтозь панарсонть сон лиснесь ломань юткс, кудоютконь панаронть эйсэ мазылгавкстнэ аламольть. Эрзянь панартнэ мокшонь панартнэнь марто а вейкетельть кода стамост, истя кандтлемаст коряс.
Эрзянь аватне кадылизь панарост кувакасто, панаралксось токась модас. Мокшонь аватне нолдылизь панаронть куншка таркастонть карксост ланга, истя панаронть алксозо таргавсь верев. Эрзянь панарсонть меште варянть видьстэ алов юты викшневкс, кона мокшонь панарсонть а эрси. Лиясто одирьватне оршильть вейкеде ламо панарт - истя эрьва панаронть алксозо неявсь верьце панаронть алдо. Панартнэнь ланга аватне оршильть руця (Маннинен 1929: 132 - 133).

Эрзянь панарось стазель кавто лияназ коцтонь келестэ, ставксонзо ютыльть икельга, удалга, кавто бокава. Видьстэ стазь ожанть кувалмозо ульнесь кенерепакарьга, ставксозо туиль велув бокава ставксонть марто. Панаронть мазылгавтызь геометриянь фигурасо викшневкст, верьде алов таргазельть викшневкс кикст (Клебанд 1986: 39).

Эрзятнень ульнесть лия панарткак - покайть, конат мазылгавтозельть гобеленэнь кондямо викшневкссэ. Од тейтертнень туртов сыль шка оршамс покай, снярдо сынь кенерильть. Покайсэ яксисть одирьвань саема таргав. Седе сыретне казилизь покаест одтнэнень.



Одирьвань панар, икеле пельде (B 2: 17; MF e 2866 - 2869)


Одирьвань панар, удало пельде (B 2: 17; MF e 2866 - 2869)


Панаронть лангсо фотосонть ламо викшневкст - лавтовга, ожава, алга. Удалганть лавтовсто алксонтень викшнезь кавксо кикст (Клебанд 1986:40). Покаенть алов свал оршильть алга панар - истя сон кирдевсь ваньксстэ. Покайтнень снярдояк эзть муськекшне.


Панартнэнь лемдизь сень коряс, сняро викшневкс таргавкст ульнесть удало пеле. Кото таргавкс марто панаронтень мерсть котова панар, сонзэ кандтлесть седе од аватне покш чистэ. Нилева панаронть ульнесть удало ниле кикст. Панаронтень лиякс мерсть паля (Куйбышевань областьсэ).

Кода эрзянь, истя мокшонь панароськак - щамось, ульнесь туникань кондямо, сонзэ арасельть ставксонзо лавтовланга. Ансяк коцтонть келезэ ды кувалмозо икельде ды удалдо седе покшольть; бокава панкстнэ ульнесть кавксть седе теенеть ды нурькинеть, сынь ютасть ожатнень алга. Ожатне стазельть келей панксонть петненень, сынь седе кувакальть эрзянь панар ожатнень коряс - кедьлапанть видьс. Оршамо варясь керязель колмо уголсо, седе тотрапециянь кондямокс (Клебанд 1986: 40).

Панаронть, конань лемезэ ульнесь полафтым щам, мокшонь аватне кандтлилизь стяко чистэ, кудоютконь, лия тевень теемстэ. Покш чистэ, снярдо тейтертне, седе од аватне оршильть вейкеде ламо панарт, полафтым щамось кадовиль нетнень алов, алга панарокс. Викшневкстнэ сонзэ лангсо седе аламольть (Белицер 1973: 55).



Панар: лангакаям; жилетка; келей каркс: кушак; паця; прясуре; мазылгавкст: монетат, кргань пирьф, гайтан, эрьгеть. Мордовия, Зубово Полянань район, Мокшонь Пимбур веле. Карм Ю. 1984. (Fk 2086 : 207)


Лангакаям щамонть оршилизь покш чистэ, сонзэ кандтлилизь седе од аватне. Тейтертне оршилизь те панаронть 19-20 иест топодемстэ, кода сыль мирденень туема шкаст.

Шуваня щамось ульнесь одирьвань оршамопель. Седе од аватне оршилизь сонзэ ансяк пек покш чинь кувалт. Мирденень лисезь авась васенце иестэ оршилизе те панаронть тетянзо-аванзо кудов молемстэ тундонь-кизэнь покш читнестэ (Белицер 1973: 56).

Панаронть, конань аватне кармасть кандтлеме седе тов сарафан ало, лемдизь рузонь валсо рукавакс, ульнесь лемезэ эсь кельсэяк - ожат.



Налява панаронь алкс нал-викшневкс марто. Мордовия, Зубова Полянань район, Мокшонь Пимбур веле. Карм Ю. 1984. (Fk 2086:113)


Панаронть лемезэ, налява, саевсь нал - викшневксэнть коряс.