Викшневкст

Эрзянь, мокшонь аватне ульнесть пек паро викшницят. Тейтерь-эйкакштнэ кармильть тонавтнеме викшнеме пек одсто, шкань молезь сынь анокстыльть эстест ули-паро, одирьвань казнеть. Хейкель сёрмадсь сенде, кода аватне базарга якамсто ваннызь лиятнень викшневксэст, кудов самодо мейле терявтылизь сынст эсь кедьсэ. Истя ташто викшневксэст лиякстомильть, сетнень ваксс теевильть одт (Маннинен 1929: 151).
Седе ламо викшневкст тейнесть панартнэнень, руцятненень. Панартнэнь лемдизь сень коряс, кодамо викшневкст ульнесть лангсонзо, кува сынь аштесть. Понасуресэ викшнелизь алга пенть, икельксэнть куншка ёнга верде алов, ожатнень. Панартнэнь, руцятнень эйсэ викшневкс артнэ теезельть пек сеедьстэ, викшневкстнэ ульнесть ансяк геометриянь сёрмасо.

Панаронть викшневксэнзэ пингестэ пингес теилизь тозо, козо тонадовсь сынст теемс традициянть коряс. Сынест путовсть лемть сень коряс, кона пельксэнть эйсэ панаронть лангсо сынь теезельть. Истя, седе умоконь панартнэсэ покш викшневксэсь, меште ланго (6-8 см), теезель кавто ёнга меште варянть эйстэ (Белицер 1973: 42).
Кувака викшневкстнэ, конат аштесть кавто пельга викшнезь куншка киксэнть эйстэ, ульнесть таргавкст. Истямо лемсэ ульнесть кувака кикстнэяк, конат ютасть удалга: эрьва ёнга эйстэст ульнесь кавто кикст, покш чинь панартнэсэ - 3-4 кикст (Белицер 1973: 42).
Кикстнэ, конат ютасть икельга ставксонть кувалт, кавто бокава, кутьмерьга, ульнесть кувалмат. Не кикстнэ викшнезельть раужо, топода-сэнь суресэ.




Эрзянь одирьва: панаралкс эльзире-керявкс марто. (В2: 17; МF е 2869)


Панар алксонть эзга теезь керявксось икеле пельде викшнезь эльзире викшневкссэ, конанень мокшонь кельсэ мерить урмаць.
Меште ланга викшневкстнэнень мерильть руця рунгот, руцянь пельцят.




Эрзянь одирьвань панар: ожа лангонь викшневкст лавту пря, ожа ланго, ожа пе. (В2: 17; МF е 2868)


Покш викшневксэнтень, кона ютась лавтовсто ожанть кувалт, мерильть лавту пря, ожа ланго викшневксэнтень - ожа ки, ожа ланго. Ожанть верьце песэ викшневксэсь ульнесь ожа пря, алце песэнть - ожа пе. Ожа пенть перьканзо ютась викшневкс вельш.
Панаронть алце пева ульнесь викшневкс алгат. Панартнэнь, руцятнень алга снярдо-снярдо таргильть викшневкст якстере суресэ эньзерть, панартнэнь алга эрзелят.





Лангакаям панар: алксканзо викшневкст эрзелят. Мордовия, 3убово Полянань район, Мокшонь Пимбур веле. (В 149: 50)



Сень коряс, кода тарксевсь суресь викшнемстэ, викшневкстнэнень мерсть: кичкере, накось.

Викшнема артнэ, сёрматне лемдязь теемань техникаст коряс. Викшневкс сёрмась гурзе, мей гурзе (гурзе мекевланк), лиси чуросто таргазь артсто. Сёрмасонть гурзя колмо колминеть викшнелизь ожатнень. Сеетьстэ таргазь артнэнь эйстэ викшневи сёрмась кемельдянь вельш.




Викшневкс ставкс налява панаронь лавтовга. (В149: 93)



Сёрмасонть ставкс арттнэ стазь киксэнь кондямокс (Белицер 1973: 58).

Сёрма лемтнень коряс чарькодеви, мейсэ теезь викшневксэсь. Лемесь кайсевкст тусь валстонть каямо челнок; арттнэ, эрзянть Данилов Викторонь коряс, "кайсезь теевсть". Сёрмась викшнявкс теезь вигинесэ, каводе-сёрманть викшнемс саить каводеть, нармунень пильге ловажат).

Сёрма лемтнень ютксо улить ламо валт, конат саевсть кудо маласо эриця ракшатнень, нармунтнень, унжатнень-карвотнень лемест эйстэ. Сеедьстэ лемтне путозельть рунго-киське пелькстнэнь коряс - лапа, пиле, сельме, сёлмо. Сынст ютксо седе содазь лемтне истят: нумолонь пиле, дигань камакшке (Белицер 1973: 47), мацей кенжеть.




Налява- панар алксонь викшневкс наля. (В149: 93)


Сёрма лемекс саевильть эрьва-мезень лемть. Нал-кондямо сёрмантень мерильть наля, те лемсэ ули панаргак - налява, конань викшневксэнзэ кавто ёнга алксонть эйсэ теезь налонь-кондямо арттсо.




Викшневкс сёрма тештенеть лангакаям-панаронь лавтовга. (В 149: 50)


Викшневкс сёрма тештенеть лангакаям-панаронь лавтовга. Мордовия, Зубово Полянань район, Мокшонь Пимбур веле. Карм Ю. 1984. (Fk 2086: 210)


Лангакаям-панарсонть ожатнень верьце пева, лавтов ставксонть ёжова теезельть тештенеть - викшневкс сёрма, конань эйсэ ульнесть ромбонь-кондямо артт велув спиралень-кондямо артт марто.
Викшневкс сёрмась кемколмова ки теезь 13 човине арттсо.

Сёрманть лемезэ лиясто ульнесь тюсонь лем: сенекш, сёрмав (а вейке тюссо).

1950-це иетнестэ викшнемасонть ламось лиякстомсь, тюсонь гаммантень совасть валдо-сэнь, розовой, апельсинэнь тюстнэ, сёрматнень кармасть тееме седе чуро артсо, сынь човалгадсть. Викшницятне кармасть тонадомо викшнеме рузонь крёстсо. Сёрматнень ютксо кармасть улеме цецянь-кондят викшневкст (Белицер 1973: 55).