ЮТАВКС ЭТНОГРАФИЯСТО (*2)
Эрзя-мокшонь раськетне лововить вейке этносокс (мордва). Эрзятнеде мокшонь раськенть коряс кавксть седе ламо. Этносонть эйсэ башка аштить кавто вишка группат: васенцесь - терюхант (рузыязь эрзят), омбоцесь - каратайть (татаронь кельсэ кортыця мокшот). (*3)
Эрзятне-мокшотне явовить оршамопелест коряс, конатне лангс ваномс, секеть: панарт-палят, ланга руцят, мазый каркст, эрьва кодамо эрьгеть, суркст, лия мазылгавтомат, прявельтявкст, карсемат (седе икеле карьть, мейле кемть).
Эрзянь аватне прязост путыльть панго, лиясто сорока, конат мокшонь аватнень оршамотнесэ эзть эрси. Мокшаватне сюлмильть прязост пацят, прясуреть. Тень кувалт аватнень прявельтявксост ало прячертне пурназельть а вейкетьстэ.
Эрзянь руцятнесэ ламо викшневкст тюжа-якстере понасуресэ, мокшонь руцятнень мазылгавтыть якстере коцт эйстэ стазь кикст.
 |  | |
| Эрзянь одирьвань оршамот. Самарань губерния. Пурныцяст: В. Розенстраух ды А. О. Вяйсянен 1915 ие. | Мокшокс оршазь ава: паля, ланга каямка, жилетка, пряспаця-конявкс, нарядт-монетат, сюлгам, кирьгань перькст. Мордовия, Зубово Полянань район, Мокшонь Пимбур. Карм Ю. 1984. (Fk 2086:104) |
Панартнэнь-палятнень эрзянь-мокшонь аватне кандтлесть а вейкетьстэ, стазельтькак, сынь лиякс. Коцтост келезэ эрзятнень-мокшотнень а вейкетель, секс ставкстнэ панарсонть-палясонть теевильть лия таркава. Мокшонь палянь ожатне кувакальть, эрзянь палянь ожатне ульнесть кенерепакарь ёнга. Эрзянь палянть икельксэзэ викшнезель оршамо варястонть саезь алов. Мокшонь авань панартнэсэ истямо икельга таргавкс арасель. Оршамсто мокшонь аватне карксылизь панарост, куншка тарканть таргилизь карксонть ланга. Эрзянь аватне кадылизь паляст кувакасто.
Икельга пацятнеяк мокшотнень эрзятнень ульнесть аволь вейкеть. Мокшотнень ульнесть кувака ожа марто рукават. Эрзятне кандтлесть кавто коцт келесэ стазь икельга паця.
 |  | |
| Эрзянь ава ушосо кудо икеле. Самарань область, Клявлинань район, Ташто Сосна веле, Сарв X. 1983. | Мокшонь ава. Мордовия, Ковылкинань р-н, Ташто Пшенево, Сарв X. 1985. |
Эрьва кодат каркст кандтлесть кода эрзятне, истя мокшотнеяк. Мокшонь аватнень карксост седе теенельть эрзянь каркстнэнь коряс, сынь ульнесть кувака ялав марто, мазылгавтозь плёскасо, кумбрясо, човалясо. Эрзятнеяк, мокшотнеяк ланга оршамост марто кандтлесть келей кушакт. Мокшотне сюлмсильть кушакт палясткак, икельгапацясткак ланга.
 |  | |
| Эрзянь ава ушосо. Самарань область, Клявлинань район, Ташто Сосна. Сарв X. 1983 | Мокшокс оршазь ава: панар полафтома, жилетка, икельга паця, кушак, паця, эрьгеть, кирьгань перькс. Мордовия, Зубова Полянань район, Мокшонь Пимбур. Карм Ю. 1984. (Fk 2086:256-260) |
Эрзянь аватнень ульнесть пулокарксост, конат мокшотнень ютксо арасельть. Мокшонь аватне сюлмсильть удалопаця. Сынст ульнесть эрьва кодамо каркст, каркс петне кувакасто нолдазельть кавто бокава, петнень удалга содозельть седе нурькине мазылгавкст.
Теньгушевань эрзятнень (шокшатнень) оршамопельть: сорока, пулай, сюлгамо.
Эрзятнень ды мокшотнень оршамосост ульнесть эрьва кодамо Мазылгавкст. Эрзятненьгак, мокшотненьгак ульнесь сюлгамост - алашань подков кондямо эрзятнень, панксонь кондямо мокшотнень. Сюлгамотнень пес поволесть пижень рисьметь, кумбрят, сиянь, пижень грушат, эрьгеть, човалят. Кода эрзятнень, истя мокшотнень эрьгест ютксо ульнесь крёст, кирьгаваст, мештест ланга ульнесть човалясто кодазь мазылгавкст.
Седикеле мокшотне-эрзятне яксесть карьсэ, покш чистэ пильгс путыльть викшневкс марто сборов кедень кемть. Мокшотне покш чистэ картнень марто тапардыльть якстере пракстат. Кем ланга сынь нолдыльть понань сурестэ кодазь верьгакст, кумажа лангот, конат ульнесть панар алксонть кондямот.
Шокшатнень, лиякс меремс Теньгушевань эрзятнень, ульнесть эсест коест. Сынь эрить лия эрзятнень коряс седе васоло чивалгома пелев, кезэрень шкань эрзя масторсонть, козо сынь кадовсть мокшонь раськенть эйстэ. Аватне кандтлить, кода лия эрзянь аватне, пулайть. Сырнесэ викшнезь сорокаськак прясост истямо, кодат кандтлить лиятне. Ансяк сюлгамост мокшонь аватнень сюлгамост кондямо, кшни панксонь трапеция (Сарв 1995).
Этнографиясо сёрмадозенть коряс, эрзянь ды мокшонь оршамопельтнень эйсэ улить рузонь, татаронь, муромонь элементт. Лем валтнэнь коряс анализэнь теемстэ седе паросто чарькодьсынек оршамопельтнень ды сынст лемтнень юрост.