МОКШЭРЗЯНЬ МИФОЛОГИЯСЬ КОДА СИСТЕМА
(кезэрень мирэнть-масторонть артовкстодо ды сонзэ эйстэ умонь арсематнеде)
Н.Ф. МОКШИН
Арсеви, мифологиясь чачсь пек умок, се шкатнестэ, зярдо ломантне анcяк кармакшность содамоc бажамо, важодемадо превть пурнамо. Ды кадык мифологиясь чачокшнось религиянть марто аволь вейке пизэсэ, ялатеке сынст ютксо ули вейке виев кикс - ломаненть арсеманзо а теевиксэнть эйстэ, фантазиянзо, конатне малавгавтыть религиянть мифологиянть марто, а максыть сынст карадо-каршо аравтомо. Чачомсто мифологиясь кеместэ сюлмавсь озномань койтнень-кирдатнень марто, совась покш пельксэкс сынст лувс. Мифтнэнь смустест теевсть озноматнень смустекс, апак вано сень лангс, кода сынь чачокшность, вейке аволь омбоцень юрсто лисекшнесь (Токарев 1962: 338; 375).
Те кедьсёрмасонть мон карман ванномо мокшэрзянь мифологиянть келейстэ, истямокс, кодамо этносонть мирдэнть-мастордонть чарькодемазо, ёжозо, кодамо сонзэ культуранть келезэ.
Мокшэрзянь раськесь уралонь келень семиясонть кезэрень раськетнеде вейке. Сон ютась историянь кувака ки, неень шкас ванстынзе эсь озноманзо, мифензэ, коензэ-кирданзо. Сынст ютксо улить пек умонь койть, истя саемс, авапазнэнь озномат, атятнень-покштятнень культось, лият раськень ды мирэнь-масторонь озномань пелькст, конатнень эйстэ сехте ламо саезель христианствастонть. Мокшэрзянь раськенть кстиндамось прядовсь ХVIII пингенть куншкасо, се шкастонть мокшэрзятнень кармасть ловомо Кристоснэнь озныця раськекс. Тень лангс апак вано, эряви меремс: христианствась совась мокшэрзятнень ёжос аволь пек кеместэ, сынь неень шкас эрьва кодамо тувталонь коряс ванстызь эсест седикелень койтнень-кирдатнень, кезэрень озноматнень.
Неть озноматне-койтне христианстванть коряс седе кеместэ сюлмавсть мокшэрзятнень эрямочист марто, седе парсте, домкасто невтить мокшэрзянь раськенть мелензэ, арсеманзо, сэредеманзо, ёрокчинзэ, сонзэ тарканзо лия раськетнень ютксо, сонзэ нишанзо этносферасонть. Озномань ды мифологиянь арсематнень историяст - ломатнень эрямочист. Сынст содазь седе парсте чарькодеви аволь ансяк мокшэрзятнень эрямо пингест, содави весе уралонь келень семиянть ды лия раськетнень эрямочисткак. Мокшэрзянь озноматне, койтне кандыть лезэ весе мирэнь-масторонь озноматнень историянть сёрмадомсто. Сынст содамось лезды чарькодемс кевкстематнень религиянть чачомадонзо-касомадонзо (озномань арсематнень сюлмавксост эрямочинть марто, седикелень озномань форматне, вере пазнэнь озноманть теемазо, озномань човорямось ды лият), сон ашти сюпав канстокс уралонь келень раськетнень, икелеяк кона эрить Равонть чирева ды Уралонть пандтнэнь ало, озномаст вейкетстямсто. Сынст озноматне-койтне пек эрявить этнологиянь ды этносоциологиянь ламо ёнкснэнь чарькодемстэ. Алкукскак, материалтнэнь ютксо, конатнень пурнынзе те кедьсёрмань авторось, улить кулят авань буень вейсендявксто, сынст челькетне кемекставсть озноматнесэ-койтнесэ.
Мокшэрзянь кезэрень озноматнень ды мифологиянть тонавтнемстэ сехте икеле вастоват пек ламо авань пазтнэнь марто: вирьсэ - Вирява (вирь + ава), модасо, масторсо - Модава, Масторава (мода, мастор + ава), ведьсэ - Ведява (ведь + ава), вармасо - Вармава (варма + ава), толсо - Толава (тол + ава), кудосо - Кудава (кудо + ава) ды лият. Авань пазтнэнь вакссо улить пазт-атяткак: Вирятя (вирь + атя), Модатя, Масторатя (мода, мастор + атя), Ведятя (ведь + атя), Варматя (варма + атя), Толатя (тол + атя), Кудатя (кудо + атя) ды лият, конатне лововить авань пазтнэнь мирдекс.
Омбоцекс лияксчикс, пазтнэ-атятне аштить аватнень мельга, сынст ролест авань пазтнэнь коряс седе вишкине. Истя, эрьва кодамо озномасо, пазморосо, ёвкссо прявксонь рольтнень налксить пазтнэ-аватне, сень шкасто, кода пазтнэ-атятне, сынст мирдетне, аштить удало, экшсэ, сынст леместкак лецтневить ланга-прява, аволь свал, конат-конатне ансяк арсевить.
Кода чарькоцтемс истямо тамашанть? Те тамашась чарькодеви, снярдо минь карматано содамо пек умонь шкань койтнень, конатнень юрост, корёност сюлмавозь авань-биень вейсендявксонть марто. Сонзэ койтне путсть тешкс се шкань озноматнень ды илатнень лангс. Ёвтазь авань пазтнэнь ловсть весемень кирдицякс-ванстыцякс. Нетне пазтнэнь лувсо арасель вере пазось, арасельть сонзэ кедь ало аштиця пазт, кода эзь ульне азорксчи ды кедь ало кирдема сынст ломатнень ютксо. Нетнень эсест ёнов молиця пазтнэнь мокшэрзятне арсизь-теизь превсэст, эсь прясост, - а теевикс, иллюзиянь кондямо мирэнь-масторонь виекс, конатне кандыть ламо зыян, снярдо ломантне а кармить сынест мель путомо, озномо, канстонь кандомо, лиякс меремс, стувтсызь. Содазь, мокшэрзятне свал учость пельдест парочи, секс сынь таркатнева, косо, эсь коряст, эрясть-аштесть пазтнэ (вирьсэ, паксясо, лей чиресэ, кудосо, утомсо, банясо, кардазсо, нешкепиресэ, калмолангсо) тейнекшнесть озкст, конатнень ютавтомсто кантнекшнесть пазтнэнень канстт, тердекшнизь симеме-ярсамо, кучнесть сыненст сюкпрят ды озномат.
Эсест кондямо пазтнэнень кемеманть а эряви ловомс мокшэрзятнень сехте васень озномань формакс. Паряк, ульнесть седеяк икелень озномань формат, конатне сюлмавозельть тотемизма марто. Истямо арсеманть коряс арась покш явома ломантнень ды кильдеметнень ютксо, вейкетне велявтовить омбоцетнекс ды мекевланк. Кода арсесть мокшэрзятне, ломанень ды кильдемень лангс молицятне (ломанть-нармунть, ломанть-лишметь, ломанть-калт, ломанть-овтт, ломанть-гуйть, ломанть-мекшеть), конань чачост кандовсть миненек фольклорсонть, эрясть кезэрень пингстэ (мокшокс "кезоронь пинге"), пек умонь пингстэ (мокшокс "пяк кунардонь пинге"), рузкс - "стародавний век", "древнейшее время".
![[Dyrin]](../pics/s002.jpg)
Ю.А.Дырин -- Мастор нармунь |
Кода неяви, тотемизмань вайгельтне марявить кона-кона ёвкстнэсэ. Истя, варакантень мокшэрзянь ёвкстнэсэ мерсикшнить Варака патяй. Улить мокшэрзянь ёвкст, конатнесэ ракшатне, примеркс, овто урьваксты тейтерь лангс ды, мекевланк, лиси мирденень цера экшс. Мокшэрзянь моросонть ломанень ды овтонь урьвакстомадо лецтневи овтонь масторось, кона ашти та-косо вирь потсо, козонь ломать а якить, ды козонь овтось кандызе салазь тейтеренть, седе тов нинзэ:
Авака овтось Катянь сасызе.
Саекшнызь Катянь сынсест масторов,
Саекшнызь Катянь сынсест кудов-чив...
(Эрзянь морот 1928: 123-124).
Овтонь семиясо Катя чачты эйкакшт овтонь-ломанень чачосо, важоди, пани прякат, пиди поза ды мейле сы эсест велев мирдензэ марто, невтсы сонзэ тетянстэнь-аванстэнь, алкуксчи, кудов а совавтсы, кадсы кардазов. Тесэ лелянзо овтонть чавсызь. Катя сюды сынст секс, мекс сынь кадызь сонзэ мирдевтеме, эйкакштнэнь - тиряка тетявтомо. Лия моросо авинесь сы тетянзо кудос кавто эйкакш-овтолевкт марто, сынь сусконисызь тетянзо кильдеметнень (Эрзянь морот 1928: 157-160). Вейке авинесь мокшэрзянь ёвкссо лайши мирдензэ-овтонзо кувалма, конатась чавовсь, кода лангозонзо прась чувто (Маскаев 1964: 261).
Не ёвкстнэсэ ды моротнесэ неяви пек умонь овтонь культось. Мокшэрзянь кезэрень урьвакстомань койтнень лувсо покш тарка максови овтонь налксемантень: овтось киштязь вети урьвакстыцянть лисьмапряс, лей чирес, киштемасонть невтни эйкакшонь теема. Мокшэрзятнень ютксо сеедьстэ ёвтнить ёвксонть овтодо, кона кандсь казне авантень сэредемадо пичкавтоманзо кис. Паксясо важодиця авантень вирьстэ лиссь овто, авинесь тандадсь, капшазь кармась менеме эйстэнзэ. Овтось стясь каршозонзо, невтизе икеле пильгензэ, конантень пезнась сярдо. Авантень мезеяк эзь кадово, кода таргамс сярдонть, ваднемс сэредиця тарканть. Овтось сюконязь тусь, курок кандсь медьте пешксе нешкепарь ды сюконязь мекев тусь вирев (Мордовские народные сказки 1985: 24).
Мотивесь овтонть чавомадо нинзэ малавикстнэнь пельде чачсь седе мейле, кода овтонь культось каладсь, кода овто экшс лисемась ды овтонь лангс урьвакстомась лоткасть арсевеме уцяскакс, кода ломантне эзть карма пелеме тотемтнэде. Овтодонть лоткасть арсеме теке умонь предкадо, сонзэ чавомась теевсь истямо жо, кода лия ракшань чавомась. Седе од ёвкстнэсэ, моротнесэ овтось невтеви аволь тотемкс, сон - пародояк паро каршо молиця (Маскаев 1964: 262-263).
Мокшэрзянь мифологиясо ломантне сеедьстэ эрить тотемонь чачосо, ветить эсест биетнень, ёвтнить сышкадонть. Сынь, мерят, велявтнить удалов, ютазь шкатнев, кода теевкшнить чувтокс, тикшекс, верьгизэкс, овтокс, идемкакс, мекшекс, гуекс, истямо тамашань ломанекс, конанть ламо чачонзо (тикшень, ракшань, нармунень). Тиринь масторонь вирьтне-лейтне - аволь ансяк таркат, косо моли эрямось, сынь тевень теицят, ломантненень лездыцят. Пейзажось кеместэ сюлмазь велень эрицятнень марто, сынст койтнень-кирдатнень марто. А чуросто кортамотне молить тевтнеде, конатне ютакшность те ды тона велесэ, те ды тона пандонть, чувтонть ало, леенть, виренть чиресэ. Седе талайчинь моротнесэ, ёвкстнэсэ ломанесь прясто-пильгс сюлмазь перть-пельганзо аштиця флоранть ды фаунанть марто, свал вешни сынст ютксто эстензэ лезэ. Ракшатне, нармунтне сонензэ лездыть, сынь содыть салава теевиця тевде, якить-ливтнить те масторсто тона масторов ды мекевланк.
Кода кемекстыть этнографиянь материалтнэ, ломантне аравтнесть эсь пряст сетне объектнэнь малас, конататнень мелест сынь вансть. Истямо мелень ваномась чачтась бажамот вейкетьстамс мартост, куш сынст пелькстнэнь (кенжест, пеест, понаст, кедест) марто. Кода ломантне сынст токшесть, ванстасть, теке амулетт, сынь учость пельдест парочи, арсесть, паряк сынсткак кармить улеме истят ёнкст. Орта лангс овтонь кенжетнень понгавтнемстэ арсесть - неть кенжетне кармить ванстомо сынст кильдеметнень апаро сельмеде, эрьва кодамо зыяндо. Ванстыця виекс мокшэрзятне ловсть гуень ташто кеденть, сюро марто ракша прятнень, лишмень пря пакартнень, конатнень сынь аравтнесть нешкепирева.
Мокшэрзянь ракшадо мифтнэнь юрост эйстэ вейкекс эряви ловомс вирень ёжосо эрямочинть, снярдо ломантне эрсесть овтнэнь-верьгизтнэнь маласо. Кона-кона ёвкстнэсэ неявить доместикациянь чельксткак. Истя, ёвксонть эйсэ верьгиздэ ды сея левкстэ (сюжетесь 129) идем сеясь, конатанть вирьсэ свал покордась верьгизэсь (овтось), туи тосто велев эрямо ломань ютксо (Мордовское народное устно-поэтическое творчество 1975: 175).
![[Dyrin]](../pics/s006.jpg)
Ю.А.Дырин -- Сярдо |
Мокшэрзятне - умонь сокиця-видиця раське. А стяк сонзэ фольклорсонть ули моронь покш пусмо, конась невти, кода кемекставсь сокамось-видемась, кода сон кадынзе удалов ракшань ды нармунень леднеманть, калонь кундамонть, теке а пек кемемачи тевтнень. Лейтмотивекс не моротнесэ-мифтнесэ - кардамс, сюдомс овтнэнь-верьгизтнэнь, нармунтнень чавноманть, сынст пизэст калавтнеманть. Ривезьтне, нумолтнэ, чинеметне, идемкатне, мацейтне пеняцить эсест эрямочинть лангс. Неть моротнень персонажтнэде вейкесь - идемка (мацей, чинеме), конатань каршо ашти охотник. Паро - берянь сон ломанесь, карми неевеме сестэ, зярдо сон чавсы - а чавсы идемканть. Кона-кона моротнесэ идемкась - нармунень чачосо тейтерь, конатанть сюдызе ававтозо улемс нармунекс мирденень лисемстэ. Охотникесь сонзэ а чавсы, идемкась тееви авакс - сонзэ никс. Сеть моротнесэ, косо оймевтеме ломанесь, конанть кудосо учить низэ ды эйкакшонзо, а кунсолы нармуненть энялдоманзо, кадови семиявтомо, снярдо ледсы сонзэ. Кода сон сы кудов, несынзе тесэ кулозь нинзэ ды эйкакшонзо, сестэ чарькоди, кодамо сон покш зыянонь теиця (Рaasonen 1938: 345-353).
Моротнесэ идемкадо ды охотникте маряви аволь ансяк оймевтеме ломанень сюдома. Сынст эйсэ идемкась, васняяк, эрямонь максыця, мейле нармунь. Мокшэрзянь мифсэнть ал лангсо аштиця идемканть чачозо канды уралонь мифологиянь умонь челькст. Пек мазыть сонзэ толганзо, рунгозо, лиясто сон колдовазь ава, лиясто - Верепазонть, Виряванть нармунезэ. Зярдо охотниктне идемканть чавсызь, сынь абунгадыть виев вайгельдензэ, ламо верьдензэ ды толгадонзо:
Менель гайкстась вайгельдензэ,
Дутк-латк пешкедсть вернедензэ,
Мастор вельтявсь толгадонзо,
Менель пешкедсь пухкедензэ
(Евсевьев 1961: 254).
Истямо гиперболизациясь тердезь невтемс чавозь нармуненть аволь стяконь чачонзо. "Яксарга" мокшонь моросонть идемкась (яксяргось) мери охотникентень:
Кодак шавсамак - аваце кулы,
Тон куду молят - рьвяце кулы,
Кенкшка сувамста иднятне кулыть.
Исце кулхцонда - яксяргть шавозе,
Кодак шавозе - аваняц кулось,
Куду молемста сонь рьвац кулось,
Ортава сувамста иднянза кулость.
Вай, вачкодсь цера кафта кяднянзон,
Пувордась цера кемонь суронзон
(Устно-поэтическое творчество мордовского народа 1963: 158).
Моротне-мифтне охотникте ды идемкадо невтить идемканть охотниктнэнь биень тотемкс. Идемкась аволь ансяк нармунь, сон ломань, чавомс конанть биень койтне а мерить. Сенде башка сон паро урьва, тагояк сон покорды се ломатнень, конатне а сокить, а видить, ансяк леднить-чавныть. Кода идемкась тееви охотникенть никс, сон мирдензэ марто туи велев, косо сынь эрить кшинь кастыцякс. Истя, нетне моротне-мифтне эрявсть зярдо мокшэрзятнень эрямосо кармась кемекставомо сокамось-видемась (Маскаев 1964: 228-229).
Сокамось-видемась мокшэрзянь фольклорсо аравтозь охотанть ды калонь кундамонть каршо, сень марто вейсэ свал моли лишменть шнамозо, конавтомо сокамось-видемась эзь арсеве. Лишмесь тееви сокамонь-видемань тешксэкс, лишмевтеме сонзэ смустезэ ёмавтови. Сон изнясы карциганонть, конатась мокшэрзянь моротнесэ-мифтнесэ ашти охотань тешксэкс, ды карми Мокшэрзянь масторонть, сонзэ раськенть трицякс. Пелькстамотне лишменть ды карциганонть юткова молить ярсамопельденть. Лишмесь ярсы тикшеде, сими ведьде, карциганось прянзо шны секс, мекс ярсы лишмень сывельде ды сими лишмень верьде. Изницякс не пелькстамотнесэ лиси се, конась седе курок пачкоди палманентень, килеенть ваксс, конатне аштить моданть чиресэ, луганаронть куншкасо. Мокшэрзянь фольклорсо ине килеесь (лиясто умаринась), теке карелонь ды финтнэнь рунатнесэ ине тумось, лопасонзо тавады менеленть. Тумонть рунатнесэ керясызь, килеенть мокшэрзянь мифтнесэ лазсы Верепазось ды чивалдомась мекев карми прамо моданть лангс (Paasonen 1938: 34-36).
Весе не моротнесэ изницякс лиси лишмесь, конатась чии апак лотксе, сестэ кода карциганось ливтямсто карми тюреме каршонзо ливтиця нармунтнень марто ды кадови удалов.
Мокшэрзянь моротнень-мифтнэнь ютксо улить истяткак, конатнесэ кортамось моли охотникенть тюремадо инегуенть марто. Инегуесь ашти палыця чувто прясо, ведь куншкасо мукорь лангсо, веши охотникенть пельде лездамо, алты тень кисэ теевемс тейтерекс ды лисемс сонзэ экшс (Paasonen 1938: 360-363). Тесэ мельс леди идемкась се моротнестэ, конатнеде мольсь кортамось седе икеле. Ансяк идезь гуесь казнень таркас карми идицянзо повамо, кучомо кудов модань сокамо. Бути сон гуенть а кунсолосы, тонатась сонзэ повасы. Эрзянь моросонть "Андямо церась вейкине" гуесь, конатанть Андямо идизе, пани сонзэ велев модань сокиця атине вакска. Кода Андямо ютась сокицянть малава, сон маринзе лишменть валонзо, конатнесэ ульнесь мурнема:
Мои кемгавтово вашо аван,
Мон и то паксянть сокия,
Мон и то паксянть изыя.
Уш а тон кадыть роботат...
(Устно-поэтическое творчество мордовского народа 1963: 163).
Гуесь а повасы Андямонть, нолдасы кудов секс, мекс сон сови кардазов ды карми кудонь-кардазонь пурнамо, "сюронь-салонь видеме".
Истяня, мокшэрзянь моротнесэ-мифтнесэ охотникте ды гуйде гуесь невтеви васня кемиця ломанень манчицякс, седе тов сон ломаненть а чавсы, ансяк тандавтнесы; гуенть арсемазо - теемс охотникенть эйстэ сокиця-видиця. Тень кувалт, гуесь не моротнесэ аволь кодамо-бути ят, сон - превс путыця, ёроков ломань, ялга. Кежейчинзэ сон невтни паронь арсезь (Paasonen 1938: 165-167; Мордовский этнографический сборник 1910: 483-484; Маскаев 1964: 230-231). Се шкастонть, зярдо чачсь те сюжетэсь, саемень хозяйстванть кармась полавтомо сокамо-видемань хозяйствась.
Ламо ёвкссо, моросо Андямо аволь ансяк охотник, сон калонь кундыцяяк. Тейтертне а молить полакс калонь кундыця цёранень, сынь пелить калонь ловажадо куломадонть, наксадо калонь чинеде. Эрзянь моросонть "Чоподань-паронь тейтересь" калонь кундыця од алясь терди тейтеренть полакс, тонатась а моли экшезэнзэ, лиси полакс сюронь кастыця цёрантень, конань аштить "вере утомсо товзюрот, ало утомсо розь сюрот" (Paasonen 1947: 49; Евсевьев 1963: 60-61).
Моротнесэ-мифтнесэ, ёвкстнесэ охотникте ды идемкадо, охотникте ды гуйде, Ведявадо ды калонь кундыцядо сюдовить охотась ды калонь кундамось, конань таркаст мокшэрзятнень эрямочисэст, мекшень кирдеманть вакссо, ялатеке ульнесь аволь вишкине. Содазь, ХVIII пингес мокшэрзятне пандсть рузонь инязоронтень каявкс кедьсэ, медьсэ, штасо, калсо. Моротне охотникте ды калонь кундыцядо аволь сняро ёвтнить хозяйствадонть, кода невтить кавто карадо каршо аштиця эрямо койть, ки седе паро эрямов.
![[Dyrin]](../pics/s001.jpg)
Ю.А.Дырин -- Тантей удома |
Минек эранть васенце тёжасто мокшэрзятне эрясть тетянь буень койсэ, авань буень койтнеде кадовкшность ансяк кое-кодамо лецтнемат. Эрьва мокшэрзянь племасо (зяро сынст эйстэ ульнесть, те шкас прок а содави) эрясть зярыя-бути тетянь буеть, конань эйсэ ульнесть зярыя-бути покш тетянь семият. Тетянь семиятнень прясо ульнесть кудатят (кудо + атя), тетянь буетнень прясо - покштят (покш + атя), племань прясо - тюштят (тёкш + атя). Биесь ульнесь велекс. А стяк неень шкас ламо эрзянь велетне пачтизь кезэрень лемест, конатне саезельть буень покштянть лемстэ; те лементень сюлмавозель бие (буе) валось (Атиньбие, Салманьбие, Иваньбие, Каканьбие, Кечень бие, Оржань бие, Орданьбуе, Сырезьбуе, Орозбие, Баеньбуе, Кулязбуе, Таразбуе ды лият).
Тетянь биень койтнень теемась мольсь сестэ, зярдо вирьга, нарга пурнамонть, калонь кундамонть ды охотанть шаштызь удалов сокамось-видемась, кильдемень кастамось, ремеслатне. Кода каладсть авань биень койтне-кирдатне, цёрань важодемась авань важодеманть коряс пек седе виевгадсь. Цёранть тарказо эрямочинь койтнесэ кармась авань таркадо седе питнев. Неть шкатнестэ чачить ды виевгадыть тетянь биесь, тетянь покш семиясь, весемсь таркасо тетянь азорксчись: теевить истят илатне, кода авань саламось ды рамамось, ламо авань лангс урьвакстомась, левиратось, покш тейтеренть вишка церыне экшс максомась ды лиятне. Весе не подавтоматне эсть юта челькевтеме мокшэрзянь мифологиянть, озноматнень, илатнень вакска.
Истя, мокшэрзянь мифтнесэ Литовадо - эрзянь тейтерьде, конань менелев салызе Пурьгинепазось сонсензэ цёранстэнь никс, эряви неемс седикелень ташто коенть, кода цёрась тукшнось эрямо нинзэ биев, синтрема од койсэ, зярдо, мекевланк, урьванть кармасть саеме мирдензэ биес. Пурьгинепазось саласы Литовань велень куросто, тундонь тейтерень морамо кужосто, нурямсто кепедьсы менелев лавсьсэ ды сайсы урьвакс цёранзо экшс. Теке жо моронть лия вариантсо Литова соды Пурьгинепазонть арсемадо, сон сонсь теде меркшнесь тейтерентень. Секс Литова а лисни куров пиземе чистэ, кекшни пазодонть кудосо, латало. Нурямо, налксеме ялганзо марто сон яки ансяк маней чистэ. Валдо чись Литованень неяви Пурьгинепазонть эйстэ ванстовомакс. Пурьгинесь, ёндолось, цярахманось салыцянть ялганзо. Сынст марто сон пансесынзе Литовань ялгатнень, коната марто тейтересь налксесь морамо кужосо, кеверясь артозь алт велень куросо. Литовань ялгатне а кармить содамо, ков сон юткстост ёмась. Те мифенть вариантнэсэ тейтересь сонсь энялды Пурьгинепазонть нолдамс менельстэ пижень рисьмесэ сиянь лавсь ды кепедемс сонзэ менелев.
Литовадо моротнесэ урьвань, нинь саламось арсеви покш тевекс, алкукс парочизэ сонзэ а свал чарькодеви. Ине изницякс салы Пурьгинепазось эсензэ семияс тейтеренть, саламсто бажи пазонь вийтнень лангс. Монь коряс Литовадо мифтне-моротне мокшэрзянь фольклорсонть теевсть сестэ, зярдо авань биень койтне кармасть лепштявомо атянь биень койтнесэ.
Сенде, кода авань биень койтне кармасть лепштавомо, ёвтни эрзянь мифесь Сэняшадо (лиякс Миняшадо), конань эйсэ аванть-дракононть изнясы цёрась-охотникесь. Не мифтнесэ коень ды мифень арсематне човорявкшныть ёвксонсенть марто. Сэняша (Миняша) - ламо вирень, модань ды ведень (лисьмапрянь) азоравась виев ды кежев тюриця, церань манчиця, кидеяк сон а пели, весень лангс ваны верде, каштансто. Зярдо Сэняшась (Миняшась) неинзе ломанень пильге чалгавкстнэнь эсензэ вирьсэ ды нарсо, сон эзь тандадо, мадсь удомо наронть лангс янонть трокс. Сон парсте соды, сонзэ кияк зярдояк эзизе токше ды нейгак а токасы, соды - колыцянть сон изнясы. Тевесь ансяк лиси а истя. Лемтеме изницясь - мездеяк а пелиця цёрынесь чавсы ламопрянь Сэняшанть (Миняшанть) удомсто, састынестэ сы ваксозонзо тор марто ды сонзэ модатнень, вирьтнень, нартнэнь сайсынзе эстензэ (Маскаев 1964: 168-172).
Кода невтить археологиянь материалтнэ, минек эранть васенце тёжань иетнень прядомсто ды омбоце тёжань иетнень кармамсто мокшэрзятнень эрямочисэ мольсть ламо полавтомат. Тюштянь пингесь прядовкшнось, сонзэ таркас кармась само лия пинге, лия койть-кирдат, конатне ульнесть сюлмазь вейке пельде урексчинть, омбоце пельде сюпавчинть марто. Теде ёвтнить мокшэрзянь се шкань азортнэнь калмосткак. Сынь эсь сюпавчист коряс пек лиякстомить калмотнеде, козонь ульнесть калмазь ламотне, аволь сюпавтнэ (Жиганов 1961: 178).
Кезэрень эрямонь каладомадонть улить кое-кодат челькст мокшэрзянь фольклорсояк. Истя, моросонть-мифсэнть "Мастор чачнесь - койтне чачнесть" кортамось моли седе, кода эрзятне пек раштасть, ламолгадсть ды кармасть эсь ютковаст тюреме. "Мекс сынь сёвныть, мекс сынь тюрить?" - кевстневи моросонть ды теске жо максови каршо вал: "Масторонть кисэ сынь сёвныть-тюрить, паксятне-нартнэ сынест а явовить." Тюрсть-тюрсть эрзятне ды чаркодсть пурнамс сисем велень покштянь промкс, конась арсесь кочкамс эрзянь кирди. Истямокс кармась моданть лангсо ды менеленть ало сехте сюпав эрзясь. Сон макссь вал улеме эрзянь кирдицякс, бути покштятне максыть тензэ лездыцякс староста ды полицейской (кода васенцесь, истя омбоцесь, содазь, моронтень путовсть седе мейле. - Н.М.). Покштятне тейсть корязонзо, сон кармась модатнень ды виртнень явшеме (Paasonen 1938: 75-82).
![[Dyrin]](../pics/s004.jpg)
Ю.А.Дырин -- Седиця тандавкс |
Лия моротнесэ ёвтави васенце эрзянь кирдинть лемезэяк - Тюштян, Тюштень, Тюштя. Не моротнесэ-мифтнесэ кортамось моли Тюштядо кода васень эрзянь инязордо. Не моротнень лейтмотивесь - эрзянь кирдиця инязоронть кочкамось. Те ине таркантень арыця ломанесь аволь кодамояк пульки-понкс ломань, сон "мода лангсо сехте сюпав, менель ало сехте козяв", сон пек виев /"сисем сабансо, комсь вейкее лишмесэ Тюштень соки", сонзэ "кшнинь кочкарянзо, кевень пря касмозо, уськсэ тапарязь куманжанзо, конястонзо лиси чись, копорьстэнзэ - валдо ковось, пря чертнень пева - тештинеть" (Paasonen 1938: 60-74, 82-99).
Тюштядо мифтне аволь ансяк эрзянь. Сынь улить мокшонь фольклорсояк. Мокшонь моротнесэ Тюштянтень мерить оцязор (оцю + азор), каназор (кан + азор). Каназор валсонть васенце пельксэсь саезь тюркань кельстэ. "Эй, шинь стямаса, панда пряса" мокшонь моросонть улить истят валт:
Эрясь Тюштянь оцязор,
Масторонь кирди каназор.
Таза сиянь палатанза,
Таза сирнень сонь щамонза.
Тюштянь ащи панда пряса,
Панда пряса, орта лангса.
Сон щаф-каряф, сон наряжаф:
Акша паля сонь лангсонза,
Акша лисмоц сонь алонза.
Весть варжаксты - ошкя строяй,
Омбоцеда - народ прдай...
(Paasonen 1947: 45-46; Уcтно-поэтическое творчество мордовского народа 1963: 254).
Монь коряс, Тюштенесь ульнесь мокшэрзянь васенце инязорокс (оцязорокс, каназорокс). Те лемесь теевсь тюштя нарицательной валстонть, конасонть седикеле мокшэрзятне тешкстнекшнесть сынст племань ветицятнень. Зярдо неть плематне вейсэндявсть вейке раськекс, раськенть прявтокс арась не тюштятнеде сехте виев тюштясь, конань нарицательной титулозо (тюштя) теевсь сонзэ лемекс (Тюштень, Тюштян, Тюштя). Тюштядо лецтнематне неень шкас эсть стувтово мокшэрзянь мельстэ-ёжосто. Нейгак мокшэрзянь велетнева марсеви "Тюштянь пинге" вал пусмось, конасо мокшэрзятне тешкстыть се шканть, зярдо сынст покштятне-бабатне эрясть атянь биесэ.
Виев полавтоматне, тюштянь пингень калавтомась путсть неявикс тешкст озноматнень-мифтнэнь лангс. Ломанень эрямочистэнть эсь парочиде ды азорксчиде чарькодематне каявсть пазтнэнь лувс. Сынст кармасть ловомо аволь ансяк кирдицякс, сынь теевсть азорокс: Вирявась теевсь Вирязоравакс, Ведявась - Ведязоравакс, Вармавась - Вармазоравакс, Модавась - Модазоравакс, Кудавась - Кудазоравакс, Толавась - Толазоравакс ды седе тов. Азор валось кармась сюлмавомо мирдест лемтнень мартояк (Вирязоратя, Ведязоратя, Кудазоратя, Вармазоратя, Модазоратя, Толазоратя ды лият).
Се шкастонть, зярдо кезэрень вейкексчинть таркас сась азорксчись, весе не пазтнэнь прявтокс тееви Нишкепазось (Шкаесь). Сонзэ архетипекс, монь коряс, ульнесть мокшэрзянь инязортнэ (оцязортнэ).
Минек шкас пачкодсть мокшэрзянь морот-мифт Нишкеденть (Шкайденть) конась эри азорксчинь ды урозксчинь койтнень-кирдатнень пингстэ, пек аламо мелявты урозтнэнь кис. Истя, мифсэнть "Уцяскань явшема" ёвтнемась моли сенде, кода покш паксясо, пандо прясо, тумо лангсо Нишкесь явши уцяска "сюпав эрзянень плошкасо, бедной эрзянень цяпкасо, грешной урознэнь пенч песэ''. Ве урозонтень мезеяк эзь сато, кува яки сон аварди, кува яки сон мелявты. Неизе урозонть Нишкепазось, кевкстизе, мекс аварди. Урозось ёвтнизе тувталтнэнь. Сестэ Нишкепазось мерсь:
Иля мелявто од цера!
Мон максан тонеть уцяска,
Мон максан тонеть часия:
Сёксень читнень самосто
Туят, уроске, солдатокс.
Вачкодсь уроз кедензэ,
Пурдась кемень суронзо...
(Paasonen 1938: 64-66; Устно-поэтическое творчество мордовского народа 1963: 43).
Мирэнть-масторонть теицякс мокшэрзятне ловсть Шкаенть (Нишкенть). Сынст коряс, седикеле пек умок мирсэнть ульнесь ансяк ведь, конатадо Шкаесь теизе моданть ды весень, мезесь сонзэ лангсо эри-касы. Сонзэ каршо аштицясь, Идемевсь, невтеви идемкань, покш пря коршонь, кедьнимилявонь ды лия чачосо. Мокшэрзянь мифтнесэ моданть-масторонть кирдить колмо калт. Истя, мифсэнть "Масторонть мезе кирдьсазо" ёвтневи:
Масторонть мезе кандсазо.
Масторонть кирдьсызь колмо калт,
Масторонть кандсызь колмо калт.
Косо не калтнэ зимовить?
Вай, моря, моря куншкасо,
Уш моря марто Рав ютксо.
Уш ве калонть лемезэ севрюга,
Омбоценть лемезэ белуга,
Вай колмоциненть осетра...
(Устно-поэтическое творчество мордовского народа 1963: 137).
Мокшэрзянь мифологиянь коряс, моданть ниле ужанзо, эрьва ужасонть ашти палмань. Неть палмантне "кара-каршо а вастыть, вейкест-вейкест а неить" (Мордовское народное устно-поэтическое творчество 1975: 105).
XX пингень васенце иес мокшэрзянь коень-кирдань ванстыцякс ульнесь велень общинась. Сонзэ прявтонть кочксесть весе кудазортнэ велень промкссо. Прявтонтень лездасть сыретне - велень атятне-покштятне, прявтось эрьва кодамо велень тевтнень ванокшнось сыретнень марто. Велень промксось кочкакшнось пандомань пурныцят, конат якасть велева ды тешкснесть чувтонь лаз лангс мокшэрзянь сёрмасо, зяро велесэнть кудот, ломанть, кильдеметь, зяро ды зярдо эряви сынст кис максомс пандома.
Велень общинась ванкшнось озномань тевтненьгак, арсесь, кодамо чистэ ютавтомс озкстнэнь, кодат озкс-атят, озкс-бабат сынст кармить ютавтомо, кодамо канст кодамо пазонтень эряви анокстамс ды лия тувталтнэнь. Общинась рамсесь кильдеметь (букат, скалт, реветь), конатнень печкелизь пазнэнь озномсто. Печкемеде икеле кильдементь шлясть-нардасть, парсте симдясть-андсть, мейле наряжазь ветясть ознома таркантень. Тесэ озкс-атясь кечесэ кайсесь кирьганзо ланга кельме ведь. Бути сон сорнозеви, видекс, эряви пазонтень, а сорнозеви, аламо шкань ютазь каить мекев, тейнить истя колмсть. Бути а сорнозеви колмоцедеяк, тукшность кудов, озксонть теекшнизь лия чистэ. Сыре Пшень мокшонь велесэ (ней Ковылкинань районсо), кода канстонь кильдементь лангсто кеденть ваткакшнызь, печкицятне сонзэ эйсэ токакшнызь кильдементь прянзо ды меркшнесть: "Простямизь!" (Harva 1952: 415).
![[Dyrin]](../pics/s010.jpg)
Ю.А.Дырин -- Раськень озкс |
Общинань койтнень челькест неявить парсте мифтнесэ ошонь, ведьгевень, церковань стявтомадо, кудонь ды кардазонь чапомодо, сынь ёвтнить седе, кода мокшэрзятне макснесть канстт модань, ведень, кудонь, кардазонь ды лия пазтнэнень, неть таркатнень ды объектнэнь кирдицятненень, азортнэнень. Мокшэрзянь велетнесэ мон а весть кунсолынь ёвтнемат, эсень сельмесэ неинь, кода кудонь ды кардазонь теемстэ тумонь мукорьтнень лангс путнесть лишмень, скалонь, ревень, сеянь, лия кодамо кильдемень, конась ульнесь кудазоронть кардазсо, понат. Путнесть ярмакткак. Пурнакшность тувор, кши-сал, пуре марто, каванясть кудонь-кардазонь теицятнень, инжетнень, лецтнесть кудонь-кардазонь пазтнэнь. Арсесть, понань, ярмаконь путомась, каванямось канды од кудонтень, од кардазонтень кувака пинге, эрицятненень ды кильдеметненень шумбрачи (Мокшин 1998: 67).
Кудонть, кардазонть алов стявтомсто понань, ярмаконь путомась - кадовкс се иладонть, зярдо макснесть кудонь, кардазонь, модань пазтнэнень алкуксонь канетт. Истя тейнесть ламо лия раськетнеяк (Зеленин 1937: 1-30). Ломатне арсесть, сень коряс пазтнэ кармить седе парсте лездамо кудонь-кардазонь тевтнень теемстэ, кемекстамо кудоютконь шумбрачинть.
Не мифтнень юткс совить моротне-мифтне Казань ды Яик оштнень кепедемадо (кое-конатнесэ Казань, Яик валтнэ вейке ошонь кавто лемть), Симбирскойсэ, лия ошсо ды велетнесэ церковань стявтомадо. Улить мифт, конатань коряс Казанесь - мокшэрзянь кезэрень ош. Ве валсо меремс, не мифтнесэнть кандовсть минек пингс эрьва кодамо шкань культурань пелькст, коень челькст.
Строямонь азортнэ - аволь ансяк мастерт, сынь озкс-атят, наркодейть, виртнень-ведьтнень, моданть, эрьва мезенть марто кортыцят, эрьва кодамо тамашань теицят. Сынь - ошонтень, церковантень канстонь кандыцят, сонзэ ниле пельксэнь керицят, не пелькстнэнь ошонть, церкованть алов ниле ужава путыцят. Сынст меремань коряс "нилень пелев керякшнызь" Федуся тейтеренть, конась "сисем алянь ве сазор, сисем урянь парыя, ней тетькастояк вейкине, шкинь авкастояк ськамнензэ" (Евсевьев 1961: 92-93).
Строямонь азортнэ - свал кавто лелят-ялакст Ивака ды Вельмака: сынь, сынст коряс лия азортнэ аштить покштякс, конатнень валост ульнесь апак сёрмадо законокс. Бути тейтеренть тетязо а карми максомо сонзэ канстокс, тетянть а кунсолыть секс, мекс, келя, сон моли Модаванть арсеманзо каршо. Бути тейтеренть тетязо сестэяк моли покштятнень каршо, сынь сонзэ симдявтсызь ды ялатеке эсест арсемаст топавтсызь (Маскаев 1964: 91).
Модаванть пельде Ивакась ды Вельмакась кармить содамо: ошонть, церкованть алов эряви канстомс ансяк "сисем алянь сазор", семиясонть вейкине тейтерне. Сынь тукшныть велева истямо тейтерень вешнеме. Алкукс, ломанень канстонть таркас сынь варчавкшныть лия канстт: сурень кире, шёлконь пусмо, лишме, атякш, сараз, кал, скал, пине, гуй. Седе кезэрень мифтнесэ Ивакась ды Вельмакась невтевить теке племань прявтт, конатне кунсолыть эсест раськень ломатнень меремаст. Меельце мифтнесэ сынь киньгак а кунсолыть, весе тевтнень теить ансяк эсест арсемаст коряс. Зярдо тейтеренть тетясь карми молеме покштятнень ды велень промксонть каршо, а карми сонзэ канстокс максомо, веши жеребеень каямо, сестэяк жеребеесь пры лангозонзо секс, мекс истяня эряви Модавантень (Масторавантень).
Седе икелень мифтнесэ строямодонть а канстокс алтазь тейтересь, а сонзэ тетязо-авазо а ёвтыть каршо вал эсест уцяскаст кувалт. Куломас кочкамонть эйсэ сынь неить вакска а ютавикс тев, а куломасонть - ломанень мель ванома. Лия арсемат марявить меельце мифтнесэ, конатасо Ивака, Вельмака ды сынст кондямо азортнэ арсить аволь ломанень шумбрачиде, сынст уцяскадо, а эсест каштанчидест, сынст седеест а сэредить беряньстэ эрицятнеде, урозтнеде, ёртнить сынст канстокс оштнень, церковатнень, ведьгевтнень алов. Содазь, истямо куломась а ваннови пазонь мелень теевемакс, сон арсеви, кода превтемень ташто ила, зярдо-бути умок чачнезь кой, конанть ванстомс а эряви. Бути седикелень мифтнесэ канстось ошонть, церкованть алов - сюпавонь, велень покштянь тейтерь, меельце мифтнесэ сон - пайстомо, биестомо тейтерне, конань арась мелезэ улемс канстокс, конань кис а кинень велень промкссонть ёвтамс вал.
Мифологиянь сюжетт пачкодсть минек шкас аволь ансяк ванькс моросо-мифтнесэ, ёвкстнэсэ-мифтнесэ, сынь мукшновить ламо лия фольклоронь жанратнесэ. Алкукс, мифтнесэ тевтне молить свал кудосто пек васоло, сисем паксянь томбале, овтонь масторсо, менельсэ, моданть, веденть ало, кунсолыцясь неть тевтнень а теи. Лирикасонть тевтне молить велесэ, кудосо, велень куросо, банясо, лей чиресэ, вирьбулосо, паксясо, пиресэ, луга лангсо истямо жо ломань марто, кодамо сонсь кунсолыцясь. Мифсэнть, эпоссонть тевесь тееви та-кодамо пазонь, тамашань вийсэ, ломань вийсэ сон а тееви - секскак сон виде; лирикасонть ломанесь седе виев, сон моли, кода машты, кода сонстензэ эряви. Содазь, тесэяк сонзэ тевензэ свал онкстневить покштятнень онкстамосо, сынст койтнень-кирдатнень коряс.
Кода тешкстасть икелень сельмсэ неицятне, мокшэрзятне морсесть эсест моротнень зярдо киштесть ды эсть киште, седязь ды апак седя, ськамост ды морамо кужосо. Кода сёрмадсь XIX пингень васенце пельксстэ Казанень университетэнть профессорось К.Фукс, мокшэрзянь морыцятне аволь ансяк морыть, сынь морамсто ахолить, лымбакстнить, пильгсэ чавить. Видестэ редизе сон аволь ансяк мокшэрзянь морамонь ёрокчинть, сон парсте невтизе мокшэрзянь раськень морыцянть вейке сокоронь чачонзо коряс, кона мерсь весенене чатьмонеме, "нежадсь вейке кедьсэ туворонть лангс, омбоце кедьсэнзэ нежадизе прянзо ды теке сокор шотландонь бардось, кармась морамо нусманя мокшэрзянь моро" (Фукс 1839: 116). Карелтнэнь ды финнтнэнь рунань морыцятнень коряс, мокшэрзятне морасть кара-каршо озазь, сельмстэ сельмс ваннозь, кедьстэ кедьс кундазь, састынестэ утякстнезь (Соколов 1922: 15).
Морамсто мокшэрзятне тейнесть эрьва кодат рунгонь велявтнемат, конатнень кезэрень шкасто ульнесть магиянь смустест. Эрьва ёнов утякснемась тешкстась кирькс, прядома, чинть ды ковонть молема. Модантень сюконямось, комадо аштемась невтсть моданть ды тоначинть марто сюлмамонть, верев кедень кепедемась - менеленть марто тапардамонть.
![[Dyrin]](../pics/s007.jpg)
Ю.А.Дырин -- Меря Чудь марто |
Сехте кезэрень мокшэрзянь мифологиянь ёнкстнэнь юрост сюлмазь уралонь раськетнень икеле пингенть марто, се умонь шкатнень марто, зярдо, примеркс, чачнесь овтонь культось ды лиятне мирдэнть-мастордонть арсематне.
ИСТОЧНИКИ И ЛИТЕРАТУРА
Архив Российского этнографического музея. Фонд 1. Опись 1. Дело 253.Астахова А. М. 1963. Шахматов как фольклорист и этнограф // Очерки истории русской этнографии, фольклористики и антропологии. Вып. 2. М.
Ауновский В. А. 1869. Этнографический очерк мордвы-мокши // Памятная книжка Симбирской губернии на 1869 г. Симбирск.
Биленко М. В. 1979. О мордовской семье ХVII века // Советская этнография, # 1.
Георги И.-Г. 1795. Онисание обитающих в Российском государстве народов, так же их житейских обрядов, вер, обыкновений, жилищ, одежд и прочих достопамятностей. Ч. 1. Спб.
Гераклитов А. А. 1931. Материалы по истории мордвы. М.: Л.
Гольмстен В. 1940. Наземные погребения в Среднем Поволжье // Краткие сообщения о докладах и полевых исследованиях Института истории материальной культуры. # 5. М.: Л.
Денисов П. В. 1959. Религиозные верования чуваш. Чебоксары.
Духовные и договорные грамоты великих и удельных князей XIV-XVI вв. 1950. М.
Евсевьев М. Е. 1961. Народные песни мордвы. Избранные труды. В 5-ти томах. Т.1. Саранск.
Евсевьев М. Е. 1963. Народные песни мордвы. Избранные труды. В 5-ти томах. Т.2. Саранск.
Жиганов М. Ф. 1961. К истории мордовских племен в конце 1 тысячелетия н. э. // Советская археология, # 4. Зеленин Д. К. 1937. Тотемы-деревья в сказаниях и обрядах европейских народов. М.: Л.
Ключевский В. О. 1956. Курс русской истории // Сочинения в 8-ми томах. Т. 1. М.
Лепехин И. И. 1771. Дневные записки путешествия по разным провинциям Российского государства 1768 и 1769 году. Спб.
Макушин Н. П. 1963. Современное эрзянское жилище на территории Мордовской АССР // Исследования по материальной культуре мордовского народа. М.
Маркелов М. Т. 1922. Саратовская мордва. Саратов.
Маркелов М. Т. 1929. Мокшэрзятнень эрямо пиньгест. М.
Маркелов М. Т. 1931. Мари: Он же. Мордва: Он же. Культ умерших в похоронном обряде волго-камских финнов // Религиозные верования народов СССР. Т. 2. М.: Л.
Маскаев А. И. 1947. Мордовская народная сказка. Саранск.
Маскаев А. И. 1964. Мордовская народная эпическая песня. Саранск.
Мельников П. И. 1839. Дорожные записки на пути из Тамбовской губернии в Сибирь // Отечественные записки. Т. 6. Мельников П. И. 1871. Нижегородская мордва // Симбирские губернские ведомости. # 26.
Мельников П. И. /Андрей Печерский/. 1909. Очерки мордвы //Полное собрание сочинений. Т. 7. Спб.
Мельников П. И. /Андрей Печерский/. 1981. Очерки мордвы. Саранск.
Милькович К. С. 1905. Быт и верования мордвы в конце XVIII столетня // Тамбовские епархиальные ведомости. Часть неофициальная. # 18.
Минх А. Н. 1890. Народные обычаи, обряды, суеверия и предрассудки крестьян Саратовской губернии // Записки Императорского Русского географического общества по отделению этнографии. Т. XIX. Вып. 2. Сиб.
Минх А. Н. 1892. Моляны и обряды мордвы Саратовской губернии // Этнографическое обозрение. # 4.
Можаровский А. 1890. История образования прихода села Селищ Сергачского уезда Нижегородской епархии // Нижегородские епархиальные ведомости. # 20.
Можаровский А. 1893. Мордво-крещенский приход с. Акузова Сергачского уезда Нижегородской епархии // Нижегородские епархиальные ведомости. # 13.
Мокшин Н. Ф. 1968. Религиозные верования мордвы. Саранск; 2-е издание, 1998. Саранск.
Мокшин Н. Ф. 1977. Этническая история мордвы. Саранск.
Мокшин Н. Ф. 1989. Мордовский этнос. Саранск.
Мокшин Н. Ф. 1991. Тайны мордовских имен. Саранск.
Мокшин Н. Ф. 1993. Мордва глазами зарубежных и российских путешественников. Саранск.
Мордовские пословицы и загадки. 1959. Саранск.
Мордовские народные сказки. 1985. Саранск.
Мордовское народное устно-поэтическое творчество. 1975. Саранск.
Национальный состав населения РСФСР. 1990. М.
Никонов В. А. 1974. Имя и общество. М.
Образцы мордовской народной словестности. 1883. Вып. I-II. Казань.
Полное собрание русских летописей. 1926. Т. 1. Л.; 1965. Т. ХI-ХII. М.; 1965. Т. ХIII. М.
Пушкин А. С. Собрание сочинений. В 10-ти томах. 1981. Т. 2, Т. 7. М.
Самородов К. Т. 1980. Мордовская обрядовая поэзия. Саранск.
Саранская таможенная книга за 1692 г. 1951. Саранск.
Смирнов И. Н. 1895. Мордва. Казань.
Снежницкий И. 1870. Праздник "Петрооскос" - Петров молян в день св. апостолов Петра и Павла в мордовском селе К-се // Пензенские епархиальные ведомости. # 22.
Соколов Б. М. 1922. Предисловие // Саратовский этнографический сборник. Саратов.
СССР в цифрах в 1989 году. 1990. М.
Токарев С. А. 1957. Религиозные верования восточнославянских народов ХIХ - начала ХХ века. М.
Токарев С. А. 1958. Этнография народов СССР. М.
Токарев С. А. 1962. Что такое мифология? // Вопросы истории религии и атеизма. М.
Устно-поэтическое творчество мордовского народа. 1963. Т. 1.; 1965. Т. 2. Саранск.
Фукс К. 1839. Поездка из Казани к мордве Казанской губернии в 1839 году // Журнал министерства внутренних дел. Ч. ХХХIV.
Шахматов А. А. 1910. Мордовский этнографический сборник. Спб.
Шуляев А. Д. 1986. Жизнь и песня. Саранск.
Шуляев А. Д. 1992. Фольклористика // Центр гуманитарных наук Мордовии. Саранск.
Энциклопедический словарь. 1896. Т. ХIХ-в. Издатели Ф.А. Брокгауз, И.А. Ефрон. Спб.
Эрзянь морот. 1928. М.
Harva, U. 1952. Die religiosen Vorstellungen der Mordwinen. Helsinki.
Mainov, W. 1889. Les restes de la Mythologie mordwine // Journal de la Societe Finno-ougrienne. V. Helsinki.
Paasonen, H. 1891. Proben der mordwinischen Volksliteratur // Journal de la Societe Finno-ougrienne. Bd. I, Heft 1. Ersjanische Lieder. Helsinki.
Paasonen, H. 1894. Proben der mordwinischen Volksliteratur // Journal de la Societe Finno-ougrienne. XII. Bd. IX, Heft 2.
Ersjanische Zauberspruche, Opfergebete, Rathsel, Sprichworter und Marchen. Helsinki.
Paasonen, H. 1938-1981. Mordwinische Volksdichtung. Bd. I. VIII. Helsinki.