Tütrik läts aida ja naaś hernit korjama. Koŕaś herneq ärq ja üteĺ hernestele et: “Mingeq kotti!”
A herneq kotti es lääq.
Tütrik hõikas hiirt: “Hiir, tulõq süüq herneq är, selle et herneq ei lääq kotti!”
Hiir tulĺ, a hernit är es süüq.
Tütrik hõikas kassi: “Kass, tulõq süüq hiir är, selle õt hiir ei süüq hernit är ja herneq ei lääq kotti!”
A kass es putuq hiirt.
Tütrik hõikas pinni: “Pini, tulõq püvväq kassi, selle õt kass ei püvväq hiirt, hiir ei süüq hernit är ja herneq ei lääq kotti!”
A pini kassi es putuq.
Siis hõikas tütrik vitsa: “Vitsaq, tulkõq peskeq pinni, selle õt pini es putuq kassi, kass ei süüq hiirt är, hiir ei süüq hernit ja herneq ei lääq kotti!”
A vits es pessäq pinni.
Tütrik hõikas kitsõ: “Kits, kits, tulõq ruttu, tulõq süüq vitsaq är, selle õt vitsaq ei pessäq pinni, pini ei putuq kassi, kass ei süüq hiirt är, hiir ei süüq hernit är ja herneq ei lääq kotti!”
Noh, kits tulõ, a vitsa är ei süüq.
Sis tütrik hõikas susi: “Susi, susi, tulõq süüq kits är, selle õt kits ei süüq är vitsa, vits ei pessäq pinni, pini ei ajaq kassi takah, kass ei süüq hiirt är, hiir ei süüq hernit är ja herneq ei lääq kotti!”
A susi es putuq kitsõ.
Sis tütrik hõikas kahru: “Kahr, tulõq ruttu! Tulõq süüq susi ärq, selle õt susi ei süüq kitsõ är, kits ei süüq vitsa är, vits ei pessäq pinni, pini ei ajaq kassi takah, kass ei süüq hiirt är, ja hiir ei süüq hernit ja herneq ei lääq kotti!”
Sis tulĺ kahr, murdsõ susi maaha. A susi sõi kitsõ ärq, kits sõi vitsa ärq, vits pesse pinni, pini ai kassi takah, kass sõi hiire ärq, hiir sõi herneq ärq, herneq lätsiq kotti ja tütrik läts kodo.
ERA, DV 588 < Võrumaa, Meremäe v, Obinitsa k – Risto Järv, Epp Kubu, Reeli Reinaus < Terje Lillmaa, snd 1970 (2005)..
[ATU 2030]
